Los próximos domingu y martes d’antroxu, 14 y 16 de febreru, el Muséu Evaristo Valle de Xixón va ufiertar dos visites guiaes. El domingu 14 la visita va tar especialmente dirixida al públicu infantil y van cuntar con un convidáu bien especial: Pierrot. «Pa que nun se sienta solu col so traxe blancu», dende’l Muséu conviden a tolos que s’apunten a ella a venir antroxaos.
El martes 16, pal públicu xeneral, va ponese’l focu na producción pictórica d’Evaristo Valle rellacionada cola temática del antroxu, en cómo esta evolucionó col pasu de los años y cuáles fueron dalgunes de les sos fontes d’inspiración, tales como la colección de conches que perteneció a so pá y que pueden contemplase nuna sala amiesta a la sala de les antroxaes.
Les visites van correr al cargu de l’alumna en práctiques del Máster Universitariu n’Estudios Avanzaos n’Hestoria del Arte, Carmen Estrada Fernández, enmarcada dientro del conveniu de collaboración cola Universidá d’Uviéu que permite tantu a estudiantes d’Hestoria del Arte, como d’otres especialidaes, tener un primer contactu col mundu llaboral. La programación del Muséu cunta amás col respaldu del Conceyu de Xixón.
Ye imprescindible acutar plaza llamando al 985 33 40 00 (de llunes a vienres de 9.00 a 14.00 h, sábados y domingos, de 12.00 a 14.00 h) o nel corréu lletrónicu programaseducativos@evaristovalle.com.
Coles oportunes midíes preventives contra la COVID-19, el Muséu Evaristo Valle permanez abiertu al públicu a diariu, siendo l’horariu pal martes d’antroxu, de 12.00 a 14.00 hores.
