El Muséu Evaristo Valle empecipia la so temporada d’esposiciones temporales 2022 cola amuesa “Ángel Guache. Pinturas (1972-1985) y otras obras”, y la so inauguración celébrase cola presencia del artista ente les 12 y les 14 hores del próximu domingu 23
de xineru. La fundación quier empecipiar -cuando se cumple’l cuarenta aniversariu de la so
constitución- cola obra d’unu de los artistes de mayor creatividá na escena española contemporánea, dándose amás la circunstancia de ser Guache el mayor donante d’obra pictórica que recibió la fundación, con 51 trabayos fundamentales de la so autoría, de los cualos 24 configuren esta esposición, qu’axunta obres de 1972 a 1985, ente les que s’atopen les once de gran formatu pertenecientes a la serie emblemática “Les isles”, según “Pintures italianes” o “Paisaxes allumaos”, ente otres.
Frutu tamién de la so refecha condición de poeta, narrador, lletrista y spoken word, del
que foi unu de los sos pioneros n’España, una sección de la esposición axunta les ediciones de la so obra poética, según la so discografía y obra audiovisual, con conteníos narrativos, lletres de cantares, videoclips, curtios… Pasáu mediu sieglu de les primeres pintures que s’esponen y cuarenta años de les sos series fundamentales, la esposición dexa destacar la estraordinaria valía y vixencia de la obra pictórica de Guache, que lo asitien como un artista plásticu fundamental de la so xeneración n’España, con independencia de la so inestimable producción poética y musical, qu’ocupa los sos últimos años d’actividá.
La esposición va poder visitase hasta’l 6 de marzu de 2022.
