El Teatru de la Llaboral acueye siete funciones del musical El Guardaespaldas esta Selmana Santa, del 13 al 17 d’abril. Llaboral Ciudá de la Cultura ye un equipamientu dependiente de la Conseyería de Cultura, Política Llingüística y Turismu y xestionáu pola Sociedá Pública de Xestión y Promoción Turística y Cultural del Principáu d’Asturies.
Tres la so triunfal estancia nel West End de Londres, llega a Xixón de la mano de LETSGO y ta basáu na aclamada película empobinada por Mick Jackson, escrita por Lawrence Kasdan (guionista de películes como L’imperiu contraataca, L’arca perdida) y protagonizada por Kevin Costner y Whitney Houston.
Con llibretu de Alexander Dinelaris, esti espectáculu ta dirixíu por Federico Bellone -ente los sos últimos trabayos destaquen la versión italiana de Mary Poppins (Disney y Cameron Mackintosh) y n’España Ghost, el musical y Dirty Dancing- y producíu por LETSGO, productora y promotora d’espectáculos con gran proyección internacional como la saga The Hole, Dirty Dancing, El Jóven Frankenstein, La Familia Addams, Ghost y Kinky Boots, que cunten con un absolutu ésitu de públicu.
El musical ta protagonizáu por Octavi Pujades, nel papel de Frank Farmer; Mireia Mambo como Rachel Marron; y Sonia Exea, quien da vida a Niki Marron. Completen l’elencu Teresa Ferrer (alternante Rachel Marron) y Jenn All (cover de Rachel y Nicki), Alonso Nsue (Bill Devaney), Sergi Albert (SY Spector), Alberto Cañes (Toni Scibelli), José María Ygarza (acosador), Pablo Ceresuela, Rubén Buika, Antonio Fago, Alejandro Fernández, Raúl Pardo, Tatiana Monells, María Reina, Raquel Caurín, Alba Dusmet y Ainhoa González.
La película empericotió a Whitney Houston y popularizó la so icónica cantar I will always love you. Amás d’esta tema, el musical contien munches otres de los cantares de la banda sonora orixinal –la más vendida de tolos tiempos y Grammy al Álbum del Añu– y otros grandes ésitos de la diva del pop como Run to you, I have nothing, So emotional, One moment in time, Queen of the night o I wanna dancie with somebody.
N’El Guardaespaldas, Frank Farmer, ex axente del Serviciu Secretu, ye contratáu pa protexer a la superestrella Rachel Marron d’un acosador desconocíu. Caún sabe qué esperar del otru. Lo que nun esperaben yera namorase.
Les entraes tán disponibles na Recepción de la Llaboral, nel Centru d’Información Turística del Principáu (CITPA) n’Uviéu, nel Centru Niemeyer n’Avilés, vía telefónica nel 985 969 708, n’entraes.liberbank.es y na web de Llaboral Ciudá de la Cultura, onde se va comunicar cualquier cambéu na programación.
