El nuevu centru de salú de Les Vegues-Los Campos, en Corvera, va empecipiar el próximu vienres la so actividá n’horariu ordinariu solo pal serviciu d’urxencies, que se va emprestar tamién en díes festivos. D’esta miente, les persones que precisen atención urxente van poder oncurrir al equipamientu tanto n’horariu ordinariu como a partir de les trés de la tarde, cuando va entrar en funcionamientu l’área d’Urxencies como puntu d’atención siguida para usuarios de Corvera y Villalegre, al igual qu’asocedía nel antiguu centru. Esta área dispón de dos consultes médiques y dos d’enfermería, amás de sala d’observación.
El nuevu equipamientu del área sanitaria III va funcionar con normalidá dende’l llunes, día 29, cuando va rematar el treslláu de les consultes ordinaries. Les nueves instalaciones, eficientes enerxéticamente, ameyoren l’accesibilidá y la comodidá de los usuarios.
El centru d’atención primaria cuenta con una superficie construyida de 2.514 metros cuadraos y ta dotáu con 6 consultes de medicina de familia, 6 d’enfermería de familia, 2 de pediatría y otres 2 d’enfermería pediátrica. Amás, dispón d’una unidá d’apoyu asistencial con dos consultes técniques polivalentes y una sala d’estracciones; una unidá de salú bucodental, otra de fisioterapia y una consulta de matrona.
Les nueves instalaciones tamién tienen sala de xuntes y dellos despachos pa coordinadores, mesmo qu’un aparcamientu soterrañu pa profesionales y otru en superficie pa usuarios.
La Conseyería de Salú invirtió 3.755.122 euros, cofinanciaos con fondos europeos Feder, nesti centru de salú, allugáu na calle Donantes de Sangre de Les Vegues, que va dar serviciu a unos 15.000 habitantes de la contorna avilesina.
