El paru xubió n’agostu en 124 persones

A pesar d’esti aumentu, el Principáu foi la tercer comunidá con menor xubida del desempléu

0
20

El paru xubió n’Asturies nel mes d’agostu. En concretu, hai 124 persones paraes más qu’en xunetu (+019 %). Nes oficines del Serviciu Públicu d’Emplegu del Principáu d’Asturies (Sepepa) figuraben 65.490 persones como demandantes d’un puestu de trabayu, amás de rexistrar un comportamientu meyor que la media del país.

El paru aumentó n’homes (197) y baxó en muyeres (73), baxó nel colectivu de persones ensin emplegu anterior y nel sector d’agricultura y medró no demás. Les xubíes foron n’alministración pública, educación, sanidá, comerciu y actividaes rellacionaes col emplegu, anque se compensaron con descensos n’hostelería, servicios a edificios y actividaes rellacionaes con xardinería. Al respective de la evolución por conceyos, ésta difier nes árees con más pesu de les actividaes turístiques: caltiénse o baxa en Llanes, Colunga Cuideiru, Gozón, Ribadeva, Tapia, Avilés y Xixón, mentes qu’aumentó llixeramente en Cangues d’Onís, Ribeseya y Uviéu.

Asturies lideró n’agostu les afiliaciones a la Seguridá Social y foi, xunto a Cantabria, la única comunidá autónoma qu’ameyoró la cifra de cotizantes. Según los datos oficiales fechos públicos güei, el númberu d’afiliaos medró’l mes pasáu en 1.679 hasta asitiase nos 374.110, lo que supón una meyora del 0,45 % frente al descensu nacional del -1,89 %. En términos interanuales, les afiliaciones medraron en 5.013 persones, el 1,36 %, y dexen asitiar el nivel de trabayadores n’alta llaboral na cifra más alta nun mes d’agostu dende’l 2011.

Tocante a la evolución del desemplegu n’agostu, el paru interanual volvió rexistrar una evolución favorable n’Asturies con un descensu de 2.803 desocupaos al respective del mesmu mes del añu pasáu, lo que representa un retrocesu del 4,1 %, percima del promediu nacional (-3,65 %).

En términos interanuales, el paru baxó en tolos sectores económicos, n’homes y en muyeres y en tolos tramos d’edá, nun siendo’l colectivu de mayores de 45 años. Destaquen sobre manera los descensos tan fuertes esperimentaos pol sector de la construcción y la industria, del 10,19 % y el 6,88 % respectivamente, lo que supón meyores na creación d’empléu estable y de calidá al tratase d’actividaes menos cícliques y condicionaes pola estacionalidá. Tamién resalta la cayida interanual del 5,85 % ente les persones ensin emplegu anterior, de manera que 404 qu’enantes nun trabayaben atoparon emplegu nel últimu añu.

Con esta evolución, el desemplegu interanual baxó de manera siguida n’agostu nos postreros seis años, depués de marcar un récord nel 2013 coincidiendo col momentu de más incidencia de la crisis económica. Amás, Asturies encadena 71 meses siguíos con retrocesos nel cómputu interanual.