La llista d’espera estructural baxó n’ochobre en 550 persones y el mes zarróse con 20.597 pacientes qu’aguardaben una intervención quirúrxica. Esta ye la primer vez dende xunu que baxa’l númberu de ciruxíes pendientes, de resultes del plan de choque impulsáu pol Serviciu de Salú del Principáu (Sespa).
Amás, Salú foi quién a menguar en cuasi 4 díes al respective de setiembre la demoranza media, qu’agora ta en 105 díes. Tamién s’amenorgó’l númberu de pacientes con más de 180 díes de demoranza por una intervención –agora hai 267 menos- y en 923 los qu’esperen ente 91 y 280 díes. Si la situación actual se compara cola d’ochobre del 2019, esto ye, primero de la pandemia, la rebaxa algama les 1.181 persones.
Del 20 de setiembre al 1 de payares, nos hospitales públicos lleváronse a cabu 652 intervenciones adicionales n’horariu de tarde pa recortar les llistes d’espera. Amás, caltuviéronse les derivaciones a centros concertaos y privaos, tal como se contempla nel plan de choque, dotáu con 8,2 millones pa efectuar 8.300 ciruxíes en seis meses. D’esta manera, n’ochobre aumentó en 1.230 el númberu de salíes de la llista d’espera quirúrxica al respective de setiembre, al pasar de 4.393 a 5.623.
El Sespa tamién confirma una medría de l’actividá de primeres consultes esternes con especialistes hospitalarios, qu’atendieron n’ochobre un total de 145.398, 18.658 más qu’en septiembre. En xeneral, les demorances medies estructurales caltiénense estables, inclusive mengüen en delles especialidaes como Neurociruxía (11 díes menos), Hematoloxía (9 menos), Endocrinoloxía (7 menos), Ciruxía Plástica (5 menos), Xeriatría (4 menos) y Dixestivu y Neumoloxía (3 menos)
Otra manera, tamién medra’l númberu de pruebes de diagnósticu. Asina, n’ochobre practicáronse 31.648, lo que supón 3.840 más qu’en septiembre. Nesti contestu, destaquen les 5.817 mamografíes (2.110 más), 10.278 TAC (684 más), 9.337 ecografíes (607 más) y 2.029 colonoscopias (160 más). Tocante a les resonancies, la demoranza media amenorgó en dos díes y lleváronse a cabu 279 más, hasta algamar un total de 4.187.
