El Conceyu de Xixón incorporó esti llunes 1 de febreru a los postreros trabayadores del Plan d’Empléu Cultural, puestu en marcha dientro del Plan d’empléu Estraordinariu incluyíu nel alcuerdu de concertación ‘Xixón Reinicia’ 2020/2021.
Dientro d’esti Plan Estraordinariu incluyíase la contratación de 20 persones del ámbitu cultural, venceyaes al mundu de la música, arte dramáticu, documentalistes o producción d’eventos, conformando una novedosa propuesta qu’asitia a Xixón como ciudá pionera nesti enfoque de los planes d’empléu municipales.
Esti plan da cumplimientu a unu de los compromisos adquiríos dientro del Plan de Choque Cultural, presentáu pol Conceyu de Xixón el pasáu mes d’abril, coles mires de desaniciar los efectos qu’esta crisis sanitaria taba xenerando nun sector, yá de por sí, precarizado.
Son contrataciones pa un añu venceyaes a distintos proyectos de la Fundación Municipal de Cultura y Divertia, pa investigar sociolóxicamente, por casu, la evolución de los festexos mientres el sieglu pasáu, desenvolver campañes de dinamización en biblioteques y museos del conceyu, o la puesta en marcha de proyectos nuevos venceyaos al FICX o al Teatru Xovellanos. Les persones escoyíes roblaron el vienres los sos contratos llaborales. El llunes van tener una xornada de formación na Axencia Llocal d’Empléu y el martes van incorporase a los sos destinos.
El Plan d’Empléu Estraordinariu ‘Xixón Reinicia’, financiáu con fondos cien por cien municipales, medra en 100 contrataciones les yá plantegaes, de manera ordinaria, nos planes llocales d’empléu, sovencionaos pol Serviciu Públicu d’Empléu del Principáu (SEPEPA). Teniendo en cuenta estes últimes incorporaciones, ente dambos planes d’empléu hai anguaño 284 persones n’activu, desenvolviendo’l so trabayu en más de 50 ocupaciones distintes, dientro de los servicios y departamentos del Conceyu.
