La decimoséptima edición del Premiu Alfonso Iglesias de cómic n’asturianu reconoció’l trabayu a dúu d’Agustín Cernuda del Río (Mieres, 1970) y Alejandro Castrillo Cernuda (Mieres, 1987), autores de la novela gráfica Mil Venecies, que narra la historia vital emocionante d’una muyer asturiana y, al tiempu, dexa retratar una parte importante de los fenómenos sociales que marcaron el sieglu xx na nuestra comunidá.
El xuráu d’esta edición tuvo presidíu pol director xeneral d’Acción Cultural y Normalización Llingüística, Antón García, y integráu pol filólogu Marcos Martínez, la ilustradora Mónica García y l’escritor Daniel Castaño, ganador na última convocatoria del premiu. Ente los valores de la obra premiada, los miembros del xuráu destacaron nel acta «la naturalidá y riqueza del llinguaxe, la fluidez de los diálogos, l’interés de les metáfores visuales de les que se val y el tratamientu gráficu de lo onírico y lo reflexivo».
El Premiu Alfonso Iglesias, convocáu pola Conseyería de Cultura, Política Llingüística y Deporte, ta dotáu con 6.000 euros y la publicación de la obra ganadora. Podíen presentase obres inédites y non premiaes n’otros concursos, d’estilu, tratamientu y tema llibre, pudiendo adoptar el desenvolvimientu d’una historia única o un conxuntu d’histories, con una estensión mínima de cincuenta páxines.
Agustín Cernuda del Río, Guti del Río, ye doctor inxenieru n’informática y trabaya anguaño como xefe de sección d’Informática na Xunta Xeneral del Principáu d’Asturies. Músicu de jazz y ganador de dalgún premiu de narraciones curties, Mil Venecies ye’l so primer cómic llargu.
Alejandro Castrillo Cernuda ye llicenciáu n’Historia del Arte pola Universidá d’Uviéu y espertu en Visualización y Illuminación 3D. Director de producción na empresa de marketing Neozink, y director creativu d’empreses dedicaes a la producción de conteníos museográficos, exerció tamién como ilustrador d’esposiciones y catálogos espositivos vinculaos al patrimoniu asturianu.
