Les asamblees de Podemos y Equo ratificaron l’astención del grupu municipal na votación de los presupuestos nel Plenu que se va celebrar esti miércoles. «Ye la meyor opción p’avanzar escontra un Xixón meyor. Nun ye’l presupuestu qu’ellaboraría Podemos, pero meyorémoslu y vamos facilitar que les cuentes de dereches queden por fin atrás”, afirmó Yolanda Huergo.
El documentu presentáu a l’asamblea foi’l definitivu. “La negociación col PSOE llevó a consensos importantes. D’ende l’astención crítica que facilita les cuentes, pero dexa al grupu municipal caltener una posición de constante vixilancia”, esplicó la vocera de Podemos-Equo. Huergo destacó que los compromisos presentaos al equipu de gobiernu al marxe de les enmiendes al borrador de Presupuestos fueron aceptaes. “Una prórroga dexaríanos con un presupuestu de la derecha, afechu por llei a la baxa, que pondría a la ciudá n’una situación crítica, bien alloñada de la razón pola que nós vinimos equí, a ameyorar la vida de la xente”, remató la concejala.
