El Gobiernu del Principáu impulsa una nueva edición de la Selmana de les Lletres Asturianes con una programación descentralizada que va llegar a 14 conceyos y que combina’l rescate d’una figura esencial na lliteratura asturiana, la de Taresa Cónsul, col teatru popular, la creación contemporánea, la memoria cultural y la participación ciudadana.
La XLVII Selmana de les Lletres Asturianes, entamada pola Conseyería de Cultura, Política Llingüística y Deporte, espliega un programa diversu que consolida la presencia del asturianu y del eonaviegu na vida pública y cultural. La celebración va entamar pasáu mañana, día 30 d’abril, col Conciertu de les Lletres Asturianes, de la Orquesta Sinfónica del Principáu (OSPA), y va desenvolvese hasta’l 10 de mayu, con más d’una ventena d’actividaes empobinaes a averar la llingua asturiana a nuevos públicos y reforzar el so usu en distintos ámbitos.
La edición d’esti añu, dedicada a Taresa Cónsul y al teatru costumista asturianu, ta coordinada por Dolfo Camilo Díaz y Laura Iglesia. La propuesta combina actuaciones escéniques, musicales y divulgatives con un homenaxe continuáu al teatru popular, una tradición centenaria que llega viva y renovada a los nuesos díes.
El Día de les Lletres Asturianes, que se va celebrar el vienres 8 de mayu, constitúi una de les xornaes centrales. Esi día, llibreríes y establecimientos de toa Asturies van aplicar un descuentu del 10 % na compra de llibros o discos n’asturianu y eonaviegu. Tamién van distribuyir la obra colectiva De viva voz. Taresa Cónsul y el teatru asturianu, hasta escosar esistencies. Trátase d’un volume que desvela aspectos inéditos d’esta autora que vivió ente los sieglos XVIII y XIX, la primer muyer de nome conocíu qu’escribió teatru n’asturianu. Asina mesmo, nes llibreríes de la zona del Eo-Navia va distribuyise tamién la obra Cásasenos a nena, un divertíu entremés de Manuel García Galano, col que se-y rinde homenaxe a un autor esencial d’esta llingua.
Programa XLVII Selmana de les Lletres
Xueves 30 d’abril
20:00 hores. Auditoriu Príncipe Felipe (Uviéu). Conciertu de les Lletres Asturianes, al cargu de la OSPA y el Coru León de Oro, baxo la dirección de Marco García de Paz.
Llunes 4 de mayu
Candás. Actu institucional d’inauguración qu’inclúi la presentación del llibru De viva voz. Taresa Cónsul y el teatru asturianu y la proyección del documental Taresa Cónsul: a la lluz de la solombra.
19:00 hores. Llangréu. Entamu del Proyectu Cónsul de Microteatru, coles pieces Comunicando, de Laura Camafreita, y Alcuerdu amistosu, de Pepín García.
Martes 5 de mayu
Corvera. Estrenu de A min nada m’in-Theresa, de Dolfo Camilo Díaz.
Candás. Mesa redonda Pa ónde va’l teatru asturianu, un espaciu de reflexón sobre’l presente y los retos del sector.
Miércoles 6 de mayu
Xixón. Pases matinales de la visita dramatizada Taresa Cónsul y el círculu de Xovellanos.
Xixón. Duces suaños: un musical pal sieglu XXI, dirixíu por Mapi Quintana.
Uviéu. Conferencia L’escenariu familiar de Taresa Cónsul Requexo y Grau y nueves representaciones del Proyectu Cónsul, coles pieces El Baile, de José Ramón Oliva, y Hermanes, de Rosi Martínez.
Xueves 7 de mayu
Colunga. Mesa redonda Un teatru asturianu en femenín.
L’Entregu. Espectáculu de voz y guitarra barroca Poesimachia, al cargu de Carlos Dávila y Pablo Zapico.
Vienres 8 de mayu
Uviéu. El Muséu Arqueolóxicu d’Asturies acueye la performance Camín del conventu en dos pases (10:30 y 12:30 hores).
Llugones. A les 11:00 hores, el centru polivalente integráu de la localidá acueye l’actu d’entrega de reconocimientos de los certámenes escolares.
Sábadu 9 de mayu
Tapia. Homenaxe a les lletres eonaviegues cola presentación de Cásasenos a nena, de Manuel García Galano, con llectura dramatizada del popular autor tapiegu.
L’Infiestu. Nueves pieces del Proyectu Cónsul: Caperucita y el llobu ligón, de Carmen Campo, y La revolución de los mandiles, de Chusa Juarros.
Llanera. Representación de la obra A min nada m’in-Theresa.
Domingu 10 de mayu
Avilés. Flashmob A toos nos… In-Thresa n’El Parche.
Cangas del Narcea. El Teatru Toreno acueye les últimes pieces del Proyectu Cónsul, con Anécdotes, de Fernando Valle, y Dell’Arte Letal, de Sergio Buelga.
