La Conseyería de Salú evacuó a les 14:35 hores d’ayeri l’Hospital del Oriente Francisco Grande Covián, en Les Arriondes, énte’l riesgu d’inundación, una hora depués de que’l Gobiernu d’Asturies pasara a situación 1 el Plan d’Inundaciones del Principáu (Planinpa).
Per una parte, la xerencia del área VI, con cabecera na capital parraguesa, dio l’alta a 26 pacientes. Por otra, los equipos sanitarios treslladaron a otros 29, según les sos patoloxíes, a los hospitales de Cabueñes de Xixón (1), San Agustín d’Avilés (11), Valle del Nalón de Llangréu (15) y Álvarez Buylla de Mieres del Camín (2). Amás, otros 23 usuarios d’hemodiálisis van ser atendíos na unidá del Hospital Fundación de Xove, en Xixón.
El Serviciu de Salú del Principáu (Sespa) va instalar nes próximes hores un puestu médicu avanzáu na redoma del hospital de Les Arriondes p’atender a los usuarios del área sanitaria, con sofitu de personal médico del propiu centru sanitariu. Si fuera menester, tamién se van movilizar vehículos de soporte vital avanzáu (UVI móvil). El Serviciu d’Emerxencies del Principáu (Sepa) yá instaló’l so propiu puestu de mandu avanzáu.
El Serviciu de Salú encamienta a los habitantes de la zona oriental que precisen atención qu’acudan preferentemente a los servicios d’urxencies de los centros de salú o llamen al 112.
Mientres se caltenga esta situación, los usuarios de los centros de salú de Colunga, Ribeseya y Llanes que rican asistencia hospitalaria urxente por emerxencia vital van ser derivaos al Hospital de Cabueñes, mentes que los de Piloña, Parres y Cangues d’Onís van ser treslladaos al Hospital Universitariu Central d’Asturies (HUCA), n’Uviéu. Asina mesmo, l’Hospital Sierrallana (Torrelavega) del Serviciu Cántabru de Salú, va atender a usuarios de Cabrales, El Valle Altu de Peñamellera y Colombres.
