El Gobiernu d’Asturies pon en marcha un nuevu recursu de sofitu a les families por aciu la creación de 21 places nel centru d’atención a la dependencia de La Madalena, n’Avilés, que se suman a les 5 esistentes. Les nueves instalaciones van destinase principalmente a estancies temporales, col fin d’ayudar a los llares de les persones con discapacidá intelectual qu’apuerten al centru.
La conseyera de Derechos Sociales y Bienestar, Melania Álvarez, y el xerente de La Fundación Asturiana d’Atención y Protección a Persones con Discapacidáes y/o Dependencies (Fasad), José Luis Palaciu, visitaron güei les nueves instalaciones, a les que les persones usuaries van incorporase de forma progresiva.
“Quien curien precisen sofitos como esti, fundamentales a la de conciliar la vida familiar, social y llaboral. Dende’l Principáu trabayamos p’ameyorar la calidá de vida non solo de les persones con discapacidá, sinón tamién de les sos families”, valoró la conseyera.
Les estancies temporales faciliten a les persones cuidadores una meyor calidá de vida y favorecen la permanencia na redolada familiar de la persona con discapacidá.
Nel centru de La Madalena trabáyase’l fomentu de la normalización y l’integración social, según el desenvolvimientu de l’autonomía personal. Tamién s’ufierta atención integral ya individualizada, afecha a les necesidaes de cada persona, y respetando la diversidá.
El presupuestu de Fasad, entidá que xestiona l’equipamientu avilesín, va aumentar en 2022 un 13,7% al respective de esti exerciciu.
