El gobiernu robla los convenios con otros nueve conceyos pa integrar los sos 15 escueles municipales de 0 a 3 años na rede autonómica

El Gobiernu d’Asturies formalizó los convenios de collaboración con otros nueve conceyos pa la integración de los sos quince escueles municipales de primer ciclu d’Infantil (0 a 3 años) na nueva rede pública, autonómica y gratuita de Les Escuelines/As Escolías.

La conseyera d’Educación, Eva Ledo, robló esos alcuerdos en representación del gobiernu. Per parte de los conceyos involucraos participaron los alcaldes José Manuel González (Cangues d’Onís), Jorge Suárez (Gozón), Roberto García (Llangréu), Enrique Riestra (Llanes), David Álvarez (Pravia), Paulo García (Ribeseya) y Sergio Hidalgo (Salas). Y en representación de los sos respectivos rexidores, exercieron de signatarios el conceyal delegáu d’Educación de Carreño, David González, y la primer teniente d’alcaldía de Samartín del Rei Aurelio, Cintia Ordóñez.

Eses quince escueles municipales –cinco en Llangréu, dos en Llanes y Samartín del Rei Aurelio y una en caún de los seis conceyos restantes– sumen un total de 54 unidaes. La matrícula actual ye de 656 neños y neñes y tienen una plantiya de 126 trabayadores, ente direcciones y técniques d’educación infantil (TEI).

Con esti tercer bloque, son yá 45 los conceyos integraos nesti proyectu educativu, pioneru n’España, colo que namás quedaríen rimaes los conceyos d’Uviéu y Xixón, que se van xuntar el próximu añu. Amás, hai qu’añedir otros 23 conceyos involucraos na estensión d’una rede que va algamar 70 de los 78 conceyos asturianos.

La rede autonómica cuenta na actualidá con 95 de escuelines/escolías operatives: 40 procedentes de la estensión y 55 de la integración. En total, hai 2.904 menores matriculaos nes 238 unidaes esistentes nesos centros. Amás, cunta con más de 600 puestos de TEI y 43 direcciones.

A falta de la inminente apertura de cuatro escuelines de les fases 1 y 2 de la estensión, esti ambiciosu proyectu educativu va rematase nel 2027 cola inauguración de los dos centros allugaos nos colexos públicos Santa Olaya y Rei Pelayo, de Xixón, y la mentada integración de les escueles municipales de los conceyos d’esti conceyu y el d’Uviéu.

La conseyera repasó los oríxenes del proyectu, la fórmula xurídica emplegada y les esperiencies acumulaes nes dos anteriores fases de la integración, “que nos sirvieron p’afacer los tiempos y poder siguir avanzando”. Ledo añedió que’l procesu d’estensión “yá ye una realidá y diseñóse teniendo en cuenta les necesidaes d’escolarización y les llistes d’espera qu’había nel so momentu”.