José Errasti, profesor del Departamentu de Psicoloxía, asume la dirección de la Cátedra Leonard Cohen de la Universidá d’Uviéu. Errasti sustitúi a Miriam Perandones, profesora del Departamentu d’Hestoria del Arte y Musicoloxía, tres ser designada directora d’área de Proyección Cultural. La Cátedra Leonard Cohen, que cunta cola collaboración del Conceyu d’Uviéu, empezó la so andadura en 2014, pocos años dempués de que’l músicu y poeta canadiense recibiera en 2011 el premiu Príncipe d’Asturies de les Lletres.
El profesor Errasti, qu’emponderó’l trabayu de la so predecesora nel cargu, destaca que, en llinia colos principios que dieron llugar a la nacencia de la cátedra, los nuesos oxetivos mientres esta nueva etapa van centrase na promoción de la obra coheniana y, por estensión, nel incentivu y el sofitu a la creación poética y musical y la so divulgación ente la sociedá. “Dende una visión bien abierta ya inclusiva del cantar popular y d’autor, proponemos convertir a la ciudá d’Uviéu nun referente nacional de dichu xéneru, favoreciendo actividaes que sirvan de puntu d’alcuentru de tolos artistes que trabayen alredor de les dimensiones poétiques, musicales ya interpretatives del cantar”, sorraya’l nuevu director de la cátedra.
Mientres l’anterior etapa, so la dirección de la profesora Perandones y gracies a la collaboración ente la Universidá y la Fundación Municipal de Cultura d’Uviéu, la cátedra esperimentó una importante proyección n’ámbitos nacionales ya internacionales, por aciu alcuentros, congresos y cursos. “Vamos intentar siguir la llinia d’esti últimu periodu”, afirma José Errasti. Empecipiáronse coles mesmes contactos y collaboraciones que pueden dar importantes frutos mientres los próximos años. “La Cátedra Leonard Cohen busca ser un valor importante de la vida artística de la ciudá y ufiertar a la ciudadanía la iniciación y profundización nuna de les formes d’espresión artística más estendíes y conocíes del últimu sieglu, como ye’l cantar popular y d’autor”, esplica’l nuevu director.
