El conseyeru d’Industria, Empléu y Promoción Económica, Enrique Fernández, presentó ayeri’l Programa Estratéxicu de la Economía Social d’Asturies, una fueya de ruta hasta 2025 qu’escuerre la modernización y puesta en valor de cooperatives y sociedaes llaborales al traviés de 6 grandes exes estratéxiques y 19 midíes específiques.
Fernández indicó que’l programa ye frutu del diálogu social y de la collaboración ente’l Gobiernu d’Asturies y el sector, de la que destacó que naz con un compromisu presupuestariu de 6,5 millones pa los próximos cuatro años y que yá nesti exerciciu va movilizar 1.700.000 euros al traviés de distintes partíes de la conseyería.
“Esti compromisu refuerza’l sofitu que siempres manifestemos a la economía social dende’l Principáu, como lo demuestren los 625.000 euros destinaos nos postreros trés años a ayudes a la incorporación de socios, al afitamientu empresarial y al fomentu del asociacionismo”, valoró’l titular d’Industria. Nesti sentíu, recordó que’l sector viose duramente cutíu pola pandemia y recibió 925.000 euros al traviés de les convocatories d’ayudes estraordinaries destinaes a desaniciar los efectos de la covid.
La ellaboración del programa estratéxicu ye unu de los compromisos de la Conseyería d’Industria, Empléu y Promoción Económica pa impulsar el desenvolvimientu y afitamientu de la economía social y el emprendimiento colectivu. Esti sector ta formáu por unes 600 empreses que xeneren 4.500 empleos directos n’Asturies.
El documentu enceta, de manera integral y con visión estratéxica, la situación actual y les midíes de sofitu al sector, col fin de favorecer la so crecedera por aciu la ordenación de los preseos normativos y financieros, la revisión de les llínees d’ayudes y l’identificación de les prioridaes. Les seis exes prioritarios del programa son los siguientes:
– Sofitu al empléu y al emprendimiento por aciu acciones que favorezan la creación d’empreses y puestos de trabayu y qu’utilicen fórmules d’economía social.
– Impulsu al afitamientu de les empreses actuales pa potenciar la so competitividá, ameyorar la so dimensión y facilitar la creación de nuevos empleos.
– Ameyorar la visibilidá del sector, dar a conocer los valores y opciones qu’ufierta y contribuyir a la so reconocencia social.
– Incorporar la innovación social nesta actividá empresarial.
– Favorecer la participación activa de les entidaes representatives nel ámbitu institucional.
– Fomentar la inclusión social nel sector.
Al actu de presentación asistieron el director xeneral de Comerciu, Emprendimiento y Economía Social, Julio Zapico, y la directora xeneral de Desenvolvimientu Rural y Agroalimentación, Begoña López, según los máximos responsables de Cooperatives Agroalimentarias del Principáu, Arturo Gancedo; de l’Agrupaciones de Sociedaes de Trabayu Acomuñáu d’Asturies (Asata), Ruperto Iglesias, y el presidente de la Confederación Empresarial Española de la Economía Social (Cepes), Juan Antonio Pedreño.
