La Conseyería de Transición Ecolóxica, Industria y Desenvolvimientu Económicu y el Conceyu de Xixón van crear un grupu de trabayu pa reconducir el proyectu de construcción del nuevu colector del ríu Peñafrancia, yá que cola redacción actual, desenvuelta pola Empresa Municipal d’Agües de Xixón (EMA), nun ye viable la execución de la obra dende’l puntu de vista técnicu nin económicu. Asina lo alcordaron esta tarde la directora xeneral del Agua, Vanesa Mateo, y el conceyal d’Urbanismu y presidente de la EMA, Jesús Martínez Salvador, tres axuntase nel consistoriu xixonés.
Mientres l’alcuentru, Mateo anunció qu’el so departamentu va rescindir el contratu de la fase 1 del proyectu, que la so execución asumiera’l Gobiernu d’Asturies, al detectase sobrecostos con motivu del aumentu de les materies primes y una valoración desaparente de los recursos que va obligar a movilizar la reubicación de los servicios afectaos poles obres.
Magar d’esta decisión y de los retrasos que puedan xenerase nel proyectu, la directora xeneral repitió que’l Gobiernu d’Asturies caltien el so compromisu de contribuyir al desenvolvimientu d’una actuación importante pa la meyora del saneamientu de Xixón y del ríu Piles. “Dende la conseyería punximos a disposición del conceyu col fin de collaborar na busca de les meyores soluciones, que van tener que ser incorporaes dende la EMA nel cambéu del proyectu. Una vegada modificáu, vamos proceder ensin demoranza a la so llicitación”, aseguró.
