Iniciativa pol Asturianu denuncia una nueva discriminación a la llingua asturiana al quedar ésta fuera del programa ‘Espaciu Audiu’ qu’entama’l Gobiernu d’España. La iniciativa, enmarcada nel PERTE Nueva Economía de la Llingua, pretende impulsar la industria dedicada al audio, como los podcasts, la música y los audiollibros, ente otres industries audio-creatives, pero únicamente en castellán y nel restu de llingües cooficiales.
La organización considera una mala noticia la esclusión del restu de llingües protexíes como ye’l casu del asturianu o del aragonés y recuerda la realidá plurillingüe del Estáu de la que tienen que ser consciente los responsables del Gobiernu d’España. Amás, una iniciativa tan interesante como ye’l casu d’‘Espacio Audio’ ye fundamental p’asentar una industria cultural propia y nel casu de la llingua asturiana puen favorecer enormemente la normalización de los idiomes y llegar a nuevos ámbitos de la sociedá y de manera especial a la mocedá.
Iniciativa pol Asturianu recuerda, una vegada más, que «la falta d’oficialidá de les llingües d’Asturies implica que la nuesa comunidá autónoma siga perdiendo financiación pa diferentes proyectos, como ocurre nesti casu. La falta d’estatus d’oficialidá provoca qu’Asturies pueda acceder a esta inversión de 160 millones d’euros pa esti proyectu que s’enmarca dientro del Proyectu Estratéxicu (PERTE) de la Nueva Economía de la Llingua. Situaciones como estes demuestren que la falta d’oficialidá ta xenerando qu’empreses culturales d’Asturies nun puedan acceder a les ayudes públiques y otres oportunidaes a les que sí que pueden acceder otres».
La organización de reivindicación llingüística reclama al Gobiernu d’España la modificación del proyectu pa incluir a les llingües protexíes dientro del proyectu o la creación d’una iniciativa similar orientada a les llingües con esta situación particular.
P’acabar, Iniciativa pol Asturianu anunció que va llevar esta cuestión al Conseyu de les Llingües del Estáu pa insistir una vegada más en reclamar una mayor sensibilidá por parte de les alministraciones públiques a la hora de la presentación d’esti tipu de planes relacionaos coles llingües d’España.
