El PSOE denuncia que la mayoría de les más de 700 viviendes anunciaes pa Nuevu Xixón correspuenden a viviendes llibres d’iniciativa privada y namás un 30% va tar suxeta a protección o concertación pública; les 50 viviendes que van dir amestaes al Plan Llave de Carmen Moriyón, tamién van tar destinaes a la venta, anque “entá nos queda por saber qué van facer coles que reciba’l gobiernu local como pagu polos espacios que van poner a disposición del sector priváu. En tou casu, les viviendes que se van a edificar nel Nuevu Xixón nun van ser viviendes precisamente afayadices. Los cálculos dícennos qu’una vivienda de 90 metros cuadraos va superar los 200.000 euros, lo que les dexa fuera del algame de munchos mozos y llares con ingresos más baxos”, esplica’l conceyal Tino Vaquero.
Pal conceyal, les actuaciones urbanístiques que se van a llevar a cabu nel Nuevu Xixón van provocar un aumentu de los precios de vienta y arriendu, esto ye, “la especulación inmobiliaria de siempre colos mesmos efectos indeseaos que yá conocimos nos años de la burbuya inmobiliaria”.
Los socialistes sorrayen la necesidá de priorizar la medría de la ufierta d’arriendu social, como asina apunten los espertos y l’informe sobre vivienda del Bancu d’España.
Nesti sentíu, cabo señalar que’l PSOE propunxo nel so plan de vivienda, el Plan 1000V, l’usu de suelu públicu dotacional pa la construcción de viviendes d’arriendu a precios algamadizos dirixíes a mozos y colectivos vulnerables. “El Conceyu tien una gran cantidá de suelu dotacional distribuyíu per tola ciudá y tendría de movilizalo p’ampliar el parque municipal de viviendes d’arriendu. Ello ye que unu d’esos suelos dotacionales atópase una parcela nel Nuevu Xixón, de 7.537 m², onde podríen llograse alredor de 75 viviendes públiques. Nun quieren actuar sobre eses parceles dotacionales nin ye’l so modelu. El so oxetivu ye favorecer el negociu priváu de les empreses promotores que nos traxo a esti puntu, cola vivienda como principal problema de la ciudadanía”, añede Vaquero.
El gobiernu d’España tomó midíes y ta aumentáu’l númberu de viviendes d’arriendu social con un esfuerzu enorme, pasando de les 300.000 viviendes que teníamos a les 596.693 viviendes de que disponemos anguaño según datos de 2023; pasemos del 1,6% al 3,3% n’apenes un añu. El Gobiernu del Principáu d’Asturies ta siguiendo la mesma llinia d’actuación na promoción de vivienda pública d’arriendu, pero, “el Conceyu nin ta nin se la espera y eso a pesar de que l’últimu estudiu lleváu a cabu pola Empresa Municipal de la Vivienda daba una cifra alarmante: solo un 1’8% de les viviendes de Xixón son públiques en réxime d’arrendamientu y la mayoría d’elles son autonómiques”.
A lo último, el PSOE recordó que la futura declaración de zones tensionaes en Cimavilla y L’Arena va implicar que los suelos dotacionales de la ciudá van tener que destinase necesariamente a la construcción de viviendes sociales, tal qu’establez la Llei de Vivienda. «Hai que recorda-ylo, porque paez qu’anden un pocu despistaos nel Gobiernu de la Sra. Moriyón, que primero voten una cosa y depués defenden la contraria. Lo qu’ellos llamen ‘intervencionismu’, nós llamámoslo cumplir col deber constitucional: garantizar el derechu a la vivienda de toles xixoneses, tal qu’establez l’artículu 47 de la Constitución Española”, conclúi’l conceyal Tino Vaquero.
