El PSOE de Xixónn denunció na tarde d’ayeri la consumación del fraude electoral tres la rotura del pactu entre Moriyón y Vox y considera que l’actual alcaldesa se sirvió fraudulentamente de les riegles democrátiques. Asina lo comunicaron el voceru del Grupu Municipal Socialista, Luis Manuel Flórez ‘Floro’, y el secretariu xeneral de los socialistes, Monchu García, quien incide en que se trata d’una decisión antemanada. La rotura taba decidida, esta yera la estratexa de Carmen Moriyón p’algamar el gobiernu de la ciudá de Xixón. Güei afayó con sorpresa que la estrema derecha diz y fai coses d’estrema derecha. A poco más de cien díes de la investidura, afaya sorpresivamente los valores del qu’hasta agora yera’l so sociu, unos valores que yá taben reflexaos nel pactu suscritu”.
Pa García nun ye creíble que la forista nun supiera a quién la abrir la puerta al gobiernu d’esti conceyu nin cuálos yeren les pretensiones de Vox. “Ella mesma robló’l documentu del alcuerdu onde vien recoyíu l’ideariu de la ultraderecha. Conocía l’ideariu de Vox, conocía los sos planteamientos programáticos y metiólos nel Gobiernu pa facese cola Alcaldía. Salióse cola suya con mentires a dos bandes”, incide al empar que se pregunten “¿y agora qué?, ¿cómo quier siguir y qué pretende pal conxuntu del conceyu? ¿Cuál va ser la continuación del fraude?, ¿buscar un tránsfuga que-y dexe siguir?, declara.
Pela so parte, Floro repitió que foi la forista quien-y dio entrada a Vox sabiendo perfectamente quién yera y cuálos son los sos postulaos. Poro, “Carmen Moriyón robló un pactu cola ultraderecha, dexando que Xixón tuviera en manos de Vox. Ella dio-y les competencies nel Gobiernu per primer vegada na hestoria de la democracia d’esti conceyu. Robló un pactu, que yo definí como’l pactu de la vergüenza, la nueche anterior a coyer el cayáu de mandu. Engañó a la ciudadanía sofitándose na estrema derecha pa llegar al poder. Ye un auténticu fraude a la democracia y pollo denuncio la falta de llexitimidá moral de l’alcaldesa”.
