El conceyal Ramón Tuero criticó en rueda de prensa l’anunciu per parte de la conceyala de Facienda, María Mitre, de la xubida d’un 30% de les tarifes d’EMULSA na cuota doméstica y de “axustes” n’otres tases qu’entá nun se desvelaron. Tuero recordó qu’esa mesma midida, presentada pol executivu socialista mientres el mandatu pasáu, foi refugada pol tripartitu actual y calificada por PP y FORO como “confiscatoria” y “hachada solidaria a les families”. El conceyal fixo fincapié en que dambos llegaron a proponer un amenorgamientu del 10,5% nel casu de los foristes y del 7% pa los populares. “Lo que l’añu pasáu nun valía, agora sí”, dixo Tuero, qu’acusó al tripartitu de nun tener “nin palabra, nin rigor, nin proyectu”.
Tuero foi especialmente críticu col fechu de que mientres la campaña electoral ya inclusive mientres el mandatu pasáu, FORO abanderara la llucha contra la baxada d’impuestos aludiendo a que si se facía una bona xestión de les empreses, nun yera necesariu xubilos” y lo primero que faen ye xubir la tasa de EMULSA”. El conceyal tamién esplicó que’l caltenimientu d’unos servicios públicos calidable esixe tarifes acordes y abondos pa garantizar la viabilidá de les empreses que los empresten, sobremanera si cada vez s’incorporen más funciones a les mesmes, como ye’l casu del serviciu de recoyida de fradadura en EMULSA.
Tuero anunció que’l PSOE va abstenese na votación del próximu Conseyu d’Alministración de EMULSA a la espera de conocer el conxuntu del proyectu del nuevu gobiernu. Tamién aseguró que, dende’l Grupu Municipal Socialista, va encetase l’alderique de les ordenances fiscales col rigor que se merecen una vegada conózase’l proyectu del gobiernu municipal”, presentando les enmiendes oportunes pa garantizar unos ingresos abondos y una presión fiscal afayadiza pa les families. Amás, tamién recordó que la nueva Llei de borrafes y l’Unión Europea afiten l’oxetivu de reciclaxe nel 50% y Xixón atópase nel 37%. “Hai que siguir trabayando y concenciando a la población y sobre manera asumir la xestión de les empreses con rigor”, afirmó’l conceyal.
