Los socialistes xixoneses amosaron la so disconformidá col proyectu del gobiernu de Carmen Moriyón de creación de dos aparcaderos de pagu nel centru de la ciudá mientres que, nel postrer Plenu, el tripartitu refugaba la propuesta socialista pa crear de manera urxente places d’aparcamientu en La Calzada, Pal conceyal Constantino Vaquero “esto amuesa’l verdaderu orde de prioridaes d’un gobiernu qu’escarez d’un proyectu global en materia de movilidá, y que prefier crear nueves places de pagu nel centru a dar soluciones a barrios como La Calzada onde nós propunximos l’acondicionamientu de parceles municipales para dar solución a un problema muncho más grave de estacionamiento”.
El conceyal socialista tamién quixo remarcar que “nun tien enforma xacíu” la habilitación d’estes places d’aparcamientu n’un área que ta condicionada pol proyectu del Plan de Víes, que va afectar a la distribución de los terrenes y del tráficu, amás del fechu de cuntar con dellos parkings públicos con munches places disponibles. “La desapaición del viaductu, el papel que va xugar Sanz Crespo na asunción de más o menos tráficu, la canalización del tresporte públicu dende la estación d’autobuses, l’aparcaderu disuasoriu de l’avenida Portugal, son elementos que tienen que ser tomaos en cuenta a la de diseñar un plan pa la zona”, aseguró’l socialista.
En cuanto al carril bici de Fomento, el socialista afirmaba que magar ye ciertu qu’esiste un conflictu ente peatón y ciclistes al qu’hai que dar solución, ye necesariu conocer primeru cómo va quedar el tráficu nes cais de Marqués de San Esteban y de Rodríguez Sampedro. Hubo amás un concursu d’idees onde se proponía una reforma del paséu de Poniente. “Proponer agora esti cambéu ye como empezar la casa pol teyáu”, sentenció.
El conceyal aseguró que’l PSOE va pidir la comparecencia del conceyal de Tráficu pa que dea esplicaciones sobro cuál va ser la fueya de ruta del gobiernu de Carmen Moriyón en materia de movilidá yá qu’hasta la fecha “paez que nun esiste un plan global d’actuación en materia urbanístico y de movilidá. Hai una falta completa d’una idea xeneral d’escontra ónde tien que caminar la ciudá nestes materies, que va avanzar, por ver, a golpe d’escurrimientu, executando actuaciones de tinte populista, aisllaes, esllavazaes y ensin rigor”.
