La Comisión Executiva de l’Agrupación Municipal Socialista, axuntada esta tarde en La Casa del Pueblu, decidió por unanimidá celebrar nel mes de setiembre les elecciones primaries pa escoyer al candidatu o candidata a l’Alcaldía del Conceyu de Xixón.
La Executiva tomó esta decisión dempués de que’l Comité Federal del PSOE validara’l calendariu de primaries, con trés feches posibles: xunetu, setiembre y payares. El PSOE llocal decidió, por tanto, acoyese a la segunda ventana ufiertada pola organización y empecipiar el cursu políticu cola elección de la persona que va encabezar la llista municipal.
La propuesta foi realizada pol secretariu xeneral, Monchu García, y ratificada pola dirección política llocal.
Según la vocera de los socialistes xixoneses, Lara Martínez, “entendemos que celebrar les primaries en septiembre da un marxe abondo pa que tou aquel que lo deseye pueda participar ensin les prieses de tener que facelo en poques selmanes. Amás, la intención ye que, una vegada falara la militancia, empecipiemos el cursu políticu de la mano de la persona que vaiga encabezar el nuestru cartelu electoral de cara a les próximes elecciones municipales”.
En xunetu, como cada añu, va celebrase l’Asamblea Ordinaria na que se va someter a valoración de la militancia la xestión política y alministrativa de la Comisión Executiva y van afrontase distintes temes d’actualidá.
Amás, ha señalase otra de les cuestiones que se trataron na xunta d’esta tarde: l’Agrupación Municipal Socialista yá trabaya na organización de la Conferencia Política, que se va convocar a lo llargo del mes de payares y va sentar les bases del programa de gobiernu col que’l PSOE xixonés va presentase a les elecciones llocales del 2027. La vocera de la Executiva quixo remarcar que “el fin ye ellaborar propuestes al traviés de la participación de militantes, asociaciones, entidaes y ciudadanía polo xeneral, propuestes de futuru pa construyir un conceyu pa vivir onde les persones seyan el centru de les polítiques”. Lara Martínez recordó amás que “na última Conferencia Política, que se celebró en febreru del 2023, la participación foi mui elevada algamando casi les 300 persones”.
