El PSOE xixonés denuncia’l pelotazu urbanísticu que pretende llevase a cabu nel desenvolvimientu del ámbitu de la Carretera de Ciares, el recintu de l’antigua Cerámica Xixonesa. Los socialistes presentaron allegamientos al trámite d’evaluación ambiental dientro del cambéu puntual del Plan Xeneral d’Ordenación que se ta tramitando a instancies del Conceyu de Xixón. Apunten que’l cambéu respuende namás a intereses económicos particulares y non públicos y tien impactos negativos medioambientalmente. “Lo que quieren facer Foru, Moriyón y los sos socios ye, nin más nin menos, qu’un mini-Benidorm en Ciares a la entrada de la ciudá, con torres de 14 plantes que van tener un impactu visual enorme, qu’estrocen por completu la fachada de la carretera de Ciares y la uniformidá de la redolada.
El cambéu de la dimensión de los edificios dobla los altores previstos nel Plan Xeneral”, esplicó’l conceyal Tino Vaqueru en rueda de prensa esti mediudía de la qu’añede que “nunu de los mayores parques urbanos qu’esisten na nuesa comunidá autónoma, ye más importante consiguir unos pocos m2 más de zones verdes (insignificantes porcentualmente nel conxuntu del parque) que’l brutal impactu visual y cambéu de modelu edificatoriu que va suponer la edificación de bloques de 14 plantes nuna amplia redolada abierta qu’apenes supera les 5 plantes. Fálennos de ‘modelu de ciudá compacta’ como xustificación d’esta intervención cuando tamos falando d’una zona dafechu consolidada y urbanizada de la contorna de la ciudá na qu’esti desenvolvimientu urbanísticu ye l’únicu que falta por executase y convertiríase nel únicu que se materializara so un modelu tan especulativu”.
Los socialistes afirmen que la presencia d’estes torres de cercade 40 metros va estrozar por completu cualesquier idea d’integración y transición de les edificaciones na redolada. Enfeen que lo que traten ye abaratar la construcción, facilitar un interés particular frente al interés públicu. “Amplíase’l númberu de viviendes significativamente, de forma absolutamente especulativa, ente otres coses porque s’amplíen les parceles del ámbitu y se recalifica dalguna finca particular que nun apurre nada al ámbitu tal que se plantega pero que multiplica casi por trés la so edificabilidá”, aportuna’l conceyal.
Con too ello, el PSOE pide esplicaciones urxentes a l’alcaldesa sobre esti cambéu que va beneficiar, apunten, a dellos promotores privaos. “Esa ye la llinia que lleva l’alcaldesa, gobernar pa beneficiu d’unos pocos. Ye importante que nun nos dexemos engañar, que Moriyón nun venga agora faciendo trampes porque esto nun va suponer más viviendes a precios algamadizos, esto va suponer facilitar les coses a les constructores por qu’aumenten los sos beneficios a costa del interés xeneral de la ciudá, una nueva amuesa de pa quién gobierna Moriyón. L’espaciu públicu de Xixón tendría de ser xenerar una ciudá vivible y algamadiza pa toes y toos, non pal pelotazu urbanísticu de diseñu pa unos pocos”, sollerta Vaqueru.
Pal conceyal socialista, la urbanización de la cortil de l’antigua Cerámica Xixonesa tien más solombres que lluces y l’alcaldesa tien d’esclariales de forma inmediata. Amás, con esta nueva construcción va aumentar el tráficu na zona en más de 800 vehículos de los nuevos residentes, amás de la circulación adicional que se va a xenerar, ensin prever viales de serviciu que nun colapsen la rotonda de Ciares y la del Llano, una cuestión que dexa ensin resolver. Coles mesmes, nel cambéu tampoco se garantiza la cesión de suelu yá urbanizáu pa la dotación d’aparcamientu en superficie qu’esixe la normativa urbanística.
“Llamentamos que l’alcaldesa siga viendo na vivienda non la necesidá habitacional de los sos ciudadanos, sinón un elementu especulativu col que volver al urbanismu d’antaño que tantos problemes xeneró-y a la ciudá. La señora Moriyón convierte a Xixón nuna ciudá en venta pal meyor postor. Atristáyanos que s’actúe asina col interés de tolos ciudadanos y por eso y como ye la nuesa obligación y la nuesa responsabilidá pa colos vecinos y vecines d’esta ciudá, vamos oponenos a esti desastre urbanísticu que quier perpetase”, conclúi Tino Vaquero.