El PSOE pide a Carmen Moriyón qu’acredite’l reintegru de los fondos públicos qu’esvió de forma indebida, como indica la sentencia del Tribunal de Cuentes. La conceyala y vocera axunta del Grupu Municipal Socialista nel Conceyu de Xixón, Carmen Eva Pérez, afirma que nun hai constancia d’esi pagu y pide qu’enseñe’l documentu que lu xustifique si ye que realmente lo fixeron. “Siguimos ensin tener constancia de que se realizara la devolución de la cantidá oxetu de la condena a les arques municipales, 31.314’29 € más intereses. Solo pidimos que faiga lo que fadría cualquier persona nesta ciudá: que lo demuestre. Ye tan cenciello como eso y asina esta parte del alderique quedaría atayada”, apunta.
Pa los socialistes, l’alcaldesa Carmen Moriyón tien d’actuar cola máxima exemplaridá atendiendo al cargu que representa: la máxima autoridá d’esti conceyu. Poro, tien de probar la devolución del dineru públicu, aseguren, de la que señalen que nunca se meteríen na vida privada de la ciudadana Carmen Moriyón, si trabaya o non na empresa privada, cuántos trabayos tien o cuánto cobra en caún y si percibe o non dietes, pero tamos falando de l’alcaldesa d’esti conceyu y toes eses cuestiones pasen a ser d’interés xeneral.
Nesi sentíu, Pérez Ordieres respondió a les pallabres d’Adrián Pumares, secretariu xeneral del partíu de l’alcaldesa, Foro Asturies, y diputáu nel Parlamentu asturianu, quien acusó a los socialistes d’actuar con odiu. “El llabor de la oposición ye la del control del gobiernu y eso ye lo que tamos faciendo dende’l Grupu Municipal Socialista: exercer con rigor el cometíu pol que tamos equí. Ye curioso qu’Adrián Pumares nun lo sepa porque lleva tola so vida política na oposición. ¿A qué se dedica entós? ¿Qué ye lo que fai? ¿Cuálos son les sos entrugues? Nós preguntamos por esto, poles cuestiones públiques del Conceyu».
