El PSOE xixonés pide a los partíos de la derecha que seyan tresparentes nes negociaciones nuna selmana trascendental pal conceyu y la so gobernabilidá. Asina lo tresmitió’l secretariu xeneral de l’Agrupación Socialista de Xixón, Monchu García, a los medios de comunicación minutos antes de l’Asamblea Estraordinaria celebrada ayeri na Casa del Pueblu onde la militancia vota a les sos candidates y candidatos al Congresu y al Senáu de cara a les próximes elecciones xenerales.
“Esto demuestra que les y los socialistes tenemos procesos participativos, democráticos, tresparentes y abiertos, como siempres foi. Pido lo mesmo a eses fuercies de la derecha que paez ser que tán calteniendo alcuentros coles mires de buscar alternatives de gobiernu a la llista más votada del PSOE: qu’actúen con total tresparencia pa que, d’una vegada , la ciudadanía sepa qué ye lo que van axustar y en qué términos”, señaló García en referencia al posible alcuerdu ente PP, Foru y Vox, yá que recordó que PP y Foro precisen el sofitu esplícitu del que paez que va ser el so tercer sociu, Vox.
“Carmen Moriyón repitió en numberoses ocasiones mientres la campaña electoral que ‘nun gobernaría con Vox’ y el PP anuncia a nivel nacional que quien tien de tener el cayáu de mandu ye la llista más votada. Trátase d’un conglomeráu de incongruecies y, por tanto, encamiento a estes dos formaciones a que seyan coherentes por respetu a los sos votantes y a les vecines y vecinos de Xixón”, afirmó.
Ante la necesidá de que la ciudadanía sepa cuál ye la fueya de ruta de la derecha y les sos aliances de cara a los próximos comicios, el secretariu xeneral punxo d’exemplu les negociaciones que se llevaron a cabu tres les elecciones de 2015 na Casa del Pueblu retresmitíes en directu.
“Quien vota al PSOE sabe cuál ye’l destín del so votu. Afirmóse a lo llargo de la campaña electoral. Sicasí, eso nun foi posible cola derecha. Quiero recordar equí una frase lliteral de Carmen Moriyón: ‘en política nun val too, Vox faltó a un compañeru y esto nun lo perdono’. Agora toca comprobar si eso yera a cencielles una farsa pa engañar a los sos electores”, añedió pela so parte el candidatu socialista a l’Alcaldía, Luis Manuel Flórez ‘Floro’, de la que repitió la necesidá de que la xente vote conociendo la forma d’actuar de los sos políticos y qué va pasar a otru día de les elecciones.
Coles mesmes, Floro afirmó qu’estos díes pudo falar colos candidatos y candidates de la izquierda y dalgunos de la derecha, pero la única que nun se punxo al teléfonu foi Carmen Moriyón, a quien pidió que predique menos el so talante dialogante y lo practique más.
