El secretariu de Política Municipal del PSOE de Xixón, César González, encamentó a l’alcaldesa Carmen Moriyón a abandonar “el bucle nel que lleva instalada selmanes” en rellación colos terrenes de Naval. “Xixón tien 180 km², pero paez qu’a la señora Moriyón namás-y importa una franxa de 9 metros que, amás, yá ye pública y que’l Puertu ta dispuestu a cede-y”, señaló.
Nun entiende “la belixerancia cola que l’alcaldesa y los sos socios de gobiernu tán encarando una discrepancia técnica cola Autoridá Portuaria de Xixón”. Según González, “la realidá ye qu’esi terrenal yá ye de los xixoneses, porque forma parte del dominiu públicu, y nun ye comprensible que l’alcaldesa lleve selmanes instalada nun discursu d’odiu, amenaces y confrontación institucional, cuando’l Puertu manifestó la so disposición a cedelo y convidar en repitíes ocasiones a sentase a axustar. Quier dar a entender que daquién-y ta quitando daqué que supuestamente ye de so cuando nun ye asina. Si güei mesmu cualquier ciudadanu fai una consulta al rexistru de la propiedá va ver qu’esos terrenes, dizlo bien claro, pertenecen a l’Autoridá Portuaria de Xixón”.
El representante socialista sorrayó que Moriyón tendría d’esplicar con claridá cuálos son “les verdaderes razones poles que rompió les negociaciones antes inclusive d’empezales”. Coles mesmes, recordó que “la mesma alcaldesa revocó decisiones de l’anterior rexidora ensin mayores problemes, daqué qu’entra dientro del xuegu democráticu”. “Lo más inasumible —añede González— ye que tea dedicando tanto esfuerzu, tiempu y recursos a una franxa de 9 metros sobre la que, nel meyor de los casos, solo podrán asitiase unos bancos y poco más, mientres tien desoyíu’l restu del conceyu”.
Nesti sen, denunció que “Xixón sigue esperando soluciones en zones como la Ería del Piles, el plan especial de Xixón Fabril, el PERI del Natahoyo o la reforma del plan especial de Cimavilla. Mentanto, pola so inoperancia, les y los xixoneses yá sabemos que vamos pagar más pol billete d’autobús por casu, y eso sí manca los intereses del ciudadanu”.
González conclúi que “si Carmen Moriyón sigue emprestando más atención a xenerar espolín, crispadura y amenaces, va pasar a la hestoria como l’alcaldesa del mandatu de los 9 metros”.
