El PSOE de Xixón va pidir esplicaciones la conceyala responsable d’empléu nel Conceyu, Ángela Pumariega, polos cursos de “llimpiadora, dependienta y caxera” del nuevu Plan Llocal de Formación. Los socialistes sollerten de que la ufierta empobinada a muyeres desemplegaes perpetúa los roles de xéneru en llugar de fomentar una igualdá real nel accesu al mercáu llaboral.
Tal que esplicó esti mediudía en rueda de prensa la edil y vocera axunta del Grupu Municipal Socialista, Carmen Eva Pérez Ordieres, les muyeres tienen mayores tases de desempléu y de temporalidá; más dificultaes d’accesu a puestos de dirección; salarios más baxos, y más dedicación a los llabores de cuidu. “Les muyeres asturianes ganen 6.590 euros menos al añu que los homes y representen el 60% de les persones desemplegaes. El 84’3% de los contratos realizaos a muyeres correspuenden al sector servicios y casi el 70% son temporales. ¿En qué midida estos cursos contribúin a desaniciar tolos sesgos sexistes y toles condiciones desfavorables qu’acabamos de mentar? ¿En qué media dexen ameyorar la presencia equilibrada de dambos sexos en determinaos sectores? ¿En qué midida dexen llevar a cabu una cultura organizativa, integradora y exenta de sesgos sexistes?”, son dalgunes de les cuestiones que va formular na próxima Comisión de Facienda, Economía y Empléu.
Pérez Ordieres punxo sobro la mesa los cursos ufiertaos nel pasáu mandatu, destinaos a cualificar profesionalmente a muyeres desemplegaes en sectores con un altu nivel de presencia d’homes, por casu, los que se realizaron pal llogru del carné de conductora d’autobús que dexó qu’un númberu importante de muyeres aprobaren les oposiciones d’EMTUSA. “Comparando estes cuestiones, lo qu’amuesa, una vegada más, ye que tenemos delantre un gobiernu de dereches con un compromisu nulu cola igualdá y a una alcaldesa aupada al poder gracies a un pactu con Vox que pon en riesgu los derechos de les muyeres. Tamos énte un claru exemplu del retrocesu al que nos lleven”, añede la conceyala.
Nesi sentíu, la conceyala amosó la so esmolición por que les responsables de los cursos de formación sexistes, la conceyala del PP, Ángela Pumariega, y la directora de l’Axencia Local d’Empléu, Carla Álvarez, seyan tamién les líderes de la empleabilidá d’espacios como’l Parque Científicu Tecnolóxicu y Naval Azul. “Tán tresmitiendo’l mensaxe de que les muyeres pueden trabayar ellí en llimpieza. Si van intentar convencenos de que preguntaron qué cursos queremos facer y que ye lo que pidieron les muyeres, gustaríame dici-yos que l’Axencia Local d’Empléu nun puede funcionar como una asociación vecinal y tien que basase en criterios d’empleabilidá», sentencia.
Toes estes circunstancies, apunten dende’l PSOE, son reflexu d’un segundu añu de mandatu ensin Plan d’Igualdá y ensin la ferramienta d’evaluación de diagnósticu, que ye precisamente la que nos dexaría midir la desigualdá real. “Non solo nun ellaboraron eses dos ferramientes fundamentales -y obligatories según la normativa- pa llevar a cabu cualquier política d’igualdá, sinón que tamién preguntamos nes comparecencies presupuestaries y respondiéronnos que nun saben cuándo van tar”, aportuna Pérez Ordieres de la que recuerda los incumplimientos de l’alcaldesa cola igualdá, amenorgando’l presupuestu na materia, resalvando los alcuerdos pa treslladar la Casa d’Alcuentru de les Muyeres al edificiu de Prendes Pando, según la formación pa los conceyales y concejalas en materia d’igualdá.
La conceyala concluyó faciendo un llamamientu: “que se tomen en serio esta cuestión y que dexen d’enllenar folios de propaganda nos que reciten los principios de la igualdá. Esti gobiernu reaccionariu nin cree na igualdá nin se tomó nunca en serio les polítiques d’empléu”.
