La conceyala del Grupu Municipal Socialista y conseyera del Conseyu d’Alministración de Divertia, Carmen Eva Pérez Ordieres, rexistró formalmente un escritu pa que la dirección de la empresa municipal paralice’l procesu pa la organización del Paséu gastro’ énte la oposición frontal de les vecines y vecinos.
Tal qu’esplicó esti mediodía en rueda de prensa, ayeri presentábense les bases con un costu que triplica al del añu pasáu pa la instalación de casetes y terraces en dos allugamientos en cuenta d’una. Al del Paséu de Begoña súmase un nuevu Paséu gastro na cai Claudio Alvargonzález que va provocar cortes de tráficu coles consecuentes dificultaes pal tránsitu nel barriu de Cimavilla. “Tanto l’asociación vecinal Gijia de Cimavilla como l’asociación Xovellanos de la zona centro amosaron el so refugu a la celebración d’un eventu que, amás, el branu pasáu provocó quexes, ente otros motivos, por falta d’hixene y descuidos cola redolada. La primer asociación salió ayeri con urxencia a manifestar públicamente’l so malestar cola propuesta de Claudio Alvargonzález; tampoco lo ven con bonos güeyos muncha hostelería de la contorna. Con too ello, creemos qu’antes de siguir alantre na axudicación del contratu, tienen qu’escuchar a quien se ven afectaos”, señala la conceyala.
El PSOE solicita, por tanto, que se suspenda cualquier procesu alministrativu que tenga que ver cola celebración del Paséu gastro mientres nun haya diálogu. Pérez Ordieres aportunó en que, al igual que les vecines y vecinos, considera que ye una zona yá de por sí tensionada en plena temporada alta braniega. “Yá diximos que’l Paséu gastro nun apurre nada a la calidá del turismu. Tán imponiendo un modelu turísticu que resulta poco atractivu y pa nada garantiza la bona convivencia cola redolada. Nin ye un modelu sostenible nin ye un modelu consensuáu”, concluyó.
