El PSOE va solicitar al Plenu la máxima protección y significación pa El Sucu como llugar de Memoria Democrática. Al traviés d’una proposición plenaria busca empecipiar un espediente pa integrar esti espaciu nel inventariu estatal y garantizar la so perdurabilidá, identificación, esplicación y señalización, mesmo quer promover la ellaboración de recursos visuales y mecanismos de caltenimientu, espardimientu ya integración y la so inclusión en rutes de la memoria. “El cementeriu del Sucu, la zona aledaña a la fuesa común y el paredón onde se realizaben les execuciones, encaxen perfectamente na definición de memoria democrática recoyida na normativa pa que forma parte de la memoria colectiva de Xixón. Esta proposición tien, por tanto, una doble función: conmemorativa y didáctica”, esplicó Carmen Eva Pérez Ordieres en rueda de prensa.
La vocera axunta del Grupu Municipal Socialista punxo en valor la necesidá d’impulsar esta iniciativa dende les alministraciones democrátiques porque “implica un mayor compromisu pela nuesa parte; ye una forma de demostrar que los representantes que nesti momentu exercemos les nueses funciones nun marcu de garantíes democrátiques reconocemos el llabor d’aquellos homes y muyeres que los sos cuerpos tán enterraos y fueron asesinaos por defender los valores democráticos de los que güei sirvimos”.
Cola declaración del Sucu como llugar de Memoria Democrática, los socialistes reivindiquen el cumplimientu d’un mandatu recoyíu pola normativa europea y les lleis estatal y autonómicu. Faenlo nun mes destacáu pa la materia porque se conmemora la lliberación del campu de concentración y esterminiu de Mauthausen y el 8 de mayu ye’l día d’alcordanza y homenaxe a les víctimes del esiliu. Pérez Ordieres sorraya tamién que Naciones Xuníes pon de manifiestu daqué tan evidente como ye’l venceyu ente’l réxime fascista de Franco y l’ayuda que recibió per parte de l’Alemaña de Hitler y la Italia fascista de Mussolini. Amás, el Conseyu d’Europa condergó’l franquismu y encamentó a España a honrar a les sos víctimes, por tanto, “y sumáu a les lleis de Memoria Democrática vixentes n’España, tenemos la obligación ética, política y llegal pa recuperar del olvidu a quien defendieron la democracia”.
Nesi sentíu, la conceyala del Grupu Municipal Socialista recordó qu’El Sucu acueye los cuerpos de gran parte de les persones represaliaes pola dictadura franquista y fueron soterraos en fueses anónimes col enfotu de que los cuerpos nun pudieren ser reconocíos poles sos families. “Tenemos xuna delda colos homes y muyeres soterraos na fuesa común del Sucu y un deber coles xeneraciones posteriores”, conclúi.
