El PSOE xixonés va presentar candidatura al Plenu de investidura y pide’l sofitu del restu de fuercies polítiques por ser la llista más votada. Asina lo anunció’l secretariu xeneral de l’Agrupación Socialista de Xixón, Monchu García, esta tarde na Casa del Pueblu.
García señaló que tanto él como’l candidatu a l’Alcaldía, Luis Manuel Flórez ‘Floro’, aconceyeron respectivamente colos secretarios del restu de partíos y col restu de candidatos y candidates, sacante con Carmen Moriyón, a la qu’a Floro foi-y imposible alcontrar, y con Vox. “Falamos con toles fuercies qu’entendemos que son partes d’esti sistema democráticu y que nun atenten contra esti sistema de gobiernu. Son conversaciones iniciales, nun hai nada concluyente, anque dende la izquierda tenemos una sintonía mayor”, añede.
Por esti motivu, encamentó a los partíos de la derecha a que faigan un cordón sanitariu cola ultraderecha y acepten que seya la llista más votada la que gobierne. “La única manera de gobernar ensin Vox ye que lo faiga la llista más votada y esa llista ye la del PSOE, por ello, tenemos la obligación d’aspirar a l’Alcaldía. Van venir munches oportunidades pal conceyu nos próximos años y tolos partíos que defendemos un sistema democráticu tenemos que tener la capacidá de sentanos y falar sobre’l futuru d’esta ciudá de forma estensa. Ye’l momentu d’atopar un gran consensu sobre’l futuru de Xixón”, apunta’l secretariu xeneral.
Amás, aportunó en que les y los socialistes quieren que prime’l diálogu y el consensu a la de tomar les decisiones de cuestiones qu’afecten al conceyu.
A entrugues de los periodistes, Monchu García, concluyó que los procesos d’autocrítica son constantes, siendo la dirección política la que representa la cadena de responsabilidaes tanto pa los ésitos como para los fracasos que tien una organización de 140 años, siempres dende’l trabayu y al traviés d’un analís xeneral.
