El Muséu del Pueblu d’Asturies ta acabante d’incorporar a la so colección trés cartelos orixinales de la Guerra Civil. Los trés caltiénense en perfectes condiciones y les sos tintes litográfiques, talo como salieron de la prensa litográfica en 1937.. salieron a puya’l 4 de xunu en Barcelona. Fueron adquiríos por un mecenes pa donalos al muséu. Dos cartelos diseñáronse en Xixón y l’otru, en Barcelona.
El primeru de los cartelos ta robláu por Manuel García Meana. Col testu «Val más prevenir que llamentar. ¡Hai que fortificar Asturies!”, foi editáu pol Partíu Comunista ya impresu nel Control Litográfico Artes Gráfiques, de Xixón. Respuende a la campaña llevada a cabu pol partíu pa la constitución de les Brigaes de Choque. Ye l’únicu cartelu de guerra d’esti dibuxante y pintor, nacíu na ciudá en 1911 y fináu en Madrid en 2008. Ye’l padre del director de cine José Luis Garci.
Víctor Aguado robla’ cartelu nel que s’anuncia un gran festival nel Teatru Olimpia, de Barcelona, a beneficiu del «heroicu pueblu asturianu». L’actu taba «patrocináu pol Conseyu d’Asturies y Llión y l’empresa socializada Casa Vilardell». L’eventu celebróse’l 27 de xunu de 1937. El testu ta escritu en catalán y diz: «¡Asturies!. Festival magne a benefici del heroic poble asturià patrocinat pel Consell d’Asturies i Lleó i de l’empresa socialitzada Casa Vilardell. El diumenge 27 de juny de 1937 a dos quarts d’onze en punt del matí al Teatre Olimpia». El cartelu imprimióse en Fotolitografía Barguño Y. C., de Barcelona.
El cartelu de Melquiades Ruiz ye un «homenaxe popular del pueblu asturianu a los sos hermanos de Méjico». Foi impresu pol Sindicatu Únicu d’Artes Gráfiques de Xixón en 1937. Ye l’únicu cartelu conocíu d’esti dibuxante y litógrafu xixonés. Melquiades Ruiz Dorronsoro, artista sordomudu, nació en Xixón en 1912; yera fíu y hermanu de litógrafos, y él mesmu trabayó na litografía d’Artes Gráfiques antes de la Guerra Civil.
Edá d’oru del cartelismu
Nengún d’estos cartelos formaba parte d’una colección pública asturiana. La so incorporación al Muséu del Pueblu d’Asturies completa la colección de cartelos asturianos anteriores a 1958, añu nel que s’establez el Depósitu Llegal. Los años de la Guerra Civil marcaron la edá d’oru del cartelismu n’Asturies, onde se fixeron en Xixón dalgunos de los meyores cartelos asturianos de tolos tiempos. El muséu caltien na actualidá d’esti periodu trelce cartelos roblaos por Germán Horacio, Goico Aguirre, Cheché, Tomás o Alfonso, a los qu’agora s’amesten estos trés. Con ellos amplíase la única colección pública de cartelos asturianos anteriores a 1958.
