Xixón recupera unu de los mercaos más populares del conceyu. L’equipu de Gobiernu autorizó esti martes la vuelta del rastru. El mercáu dominical va celebrase esta fin de selmana per primer vegada dende la declaración del estáu d’alarma. Anque la celebración d’estos eventos permítese dende hai selmanes, los vendedores refugaron facelo hasta agora, cuando Asturies ya s’alcuentra na fase 3 de la desescalada.
La cita torna con dellos cambeos que van permitir garantizar la distancia de seguranza. El rastru va ocupar l’aparcamientu asitiáu ente l’alameda de Manuel Preciado y l’avenida Enrique Castro ‘Quini’. Nesti espaciu van situase los puestos d’artículos usaos. Los puestos d’alimentación, artículos nuevos y los de numismática y filatelia van ocupar la totalidá del espaciu situáu tres el Palaciu de Deportes. D’esta manera garantízase la instalación de tolos puestos qu’habitualmente participen nel mercáu.
