El Serviciu Públicu d’Empléu d’Asturies (Sepepa) punxo en marcha la campaña Trabayamos pa que nun pares, cola que busca dar un xiru a la so imaxe pa reforzar el so papel como organismu clave na intermediación llaboral. L’oxetivu ye poner el focu nos menores de 30 años, aumentar la población activa y sofitar a les empreses asturianes que precisen incorporar personal.
La campaña enmárcase nel procesu de modernización y reforma entamáu pol serviciu públicu que se concentra en cuatro exes básiques: polítiques actives d’empléu, formación, orientación llaboral ya intermediación.
La directora xeneral destacó l’apueste de la Conseyería de Ciencia, Empreses, Formación y Empléu por averar el Sepepa a la sociedá y dar a conocer tolos servicios y programes qu’ufierta. Unu de los oxetivos ye llegar a mozos menores de 30 años, ente quien el serviciu d’empléu ye menos conocíu que pa otros colectivos prioritarios, como les persones vulnerables, paraos de llarga duración y mayores de 45 años.
Flórez indicó que “queremos llegar tanto a mozos que nun tienen empléu nin se tán formando, como a los que tán buscando trabayu o a puntu d’acabar la so formación y entrar nel mercáu llaboral”.
La directora xeneral aludió a la bona evolución del mercáu llaboral asturianu nos últimos años y la necesidá d’incidir nel aumentu de la población activa. Pa ello, fixo fincapié nel papel del serviciu d’empléu como correa de tresmisión ente la empresa y la persona demandante de trabayu.
El pasáu añu, el Sepepa publicó 12.600 ufiertes llaborales n’Asturies y más de 2.500 empreses con actividá na comunidá autónoma utilizaron los sos servicios pa buscar personal. La directora xerente del serviciu d’empléu, Begoña López, apuntó como oxetivu llegar a toles empreses asturianes con trabayadores, pa que “conozan les posibilidaes qu’ufiertamos, tanto en formación a la carta como n’intermediación”.
La campaña incide especialmente na formación, un exe fundamental de les polítiques d’empléu públicu. Los datos acoten que la formación profesional, el bachilleratu y les titulaciones universitaries son víes más segures escontra l’empléu.
