Los profesionales del Serviciu de Salú del Principáu (Sespa) realizaron nos primeros nueve meses del añu 37.953 intervenciones quirúrxiques programaes. Esta cantidá supón una crecedera d’un 10% respectu al mesmu periodu de 2021, a pesar de la elevada presión asistencial causada pola pandemia.
Amás, nos hospitales del Serviciu de Salú efectuáronse otres 5.040 ciruxíes adicionales n’horariu de tarde dende’l 20 de setiembre de 2021, fecha d’empiezu del primer plan de choque p’amenorgar los efectos de la pandemia nes llistes d’espera. El mes pasáu realizáronse 293, un númberu cimeru al restu de los meses de branu y un 47% más que l’actividá de fai nun añu.
Cabi destacar que s’amontaron, per segundu mes consecutivu, les indicaciones quirúrxiques y el númberu d’intervenciones hasta asitiase en cifres similares a les d’antes dl andanciu. Ello ye que setiembre rexistró’l mayor númberu d’entraes en llista d’espera de los últimos años (4.946) y tamién de salíes (4.519. Estes cantidaes llográronse magar la presión asistencial derivada del ingresu de pacientes pluripatológicos, con o ensin covid, y al descansu branizu de los profesionales. Asina, la llista estructural asitióse en 23.600 operaciones pindies.
A pesar d’esta situación, la demoranza media pa una operación asitiase en 104 díes, unu más que n’agostu y cuatro menos qu’en septiembre de 2021. Coles mesmes, el númberu de pacientes qu’aguarden menos de 90 díes por una ciruxía programada amenorgóse respectu al mes anterior, al pasar de 11.599 a 10.981. Nel casu d’esperes de más de 180 díes, la llista menguó en 217 persones al respective de 2021.
Los especialistes hospitalarios atendieron 132.363 primeres consultes, 19.500 pacientes más que n’agostu, lo que supón una medría del 17,3%. Foi’l mes de setiembre con más consultes realizaes de los postreros cinco años. La demoranza media pa una primer consulta caltener por segundu mes consecutivu en 80 díes. Amás, les esperes pa una consulta de Xinecoloxía menguaron en 24 díes; pa Otorrinolaringoloxía y Hematoloxía en 18 y 12 díes, respectivamente, y nuna selmana pa Reumatoloxía.
Tocantes a les pruebes diagnósticas, realizáronse 29.576, tamién la cifra más alta pa esti mes dende 2017 y un 9,4% percima de les efectuaes va un añu en toles técniques. El númberu de resonancies, escáneres, mamografíes y colonoscopies practicaes xube un 5,2% respectu al mesmu periodu de 2019. La demoranza media mengua al respective de agostu en colonoscopies y escáneres, y caltiense estable n’ecografíes y resonancies.
