Ayeri empezó a rodar la bola nel Palaciu de los Deportes y fíxolo con dos emocionantes partíos que finalmente cayeron del llau de los primeramente favoritos, pero con marcadores mui apretaos y con incertidume hasta’l partíu final.
Nel primer partíu enfrentábense’l C.P. Fraga y el Cerdanyola C.H., nun igualáu alcuentru nel que’l cuadru catalán ufiertaba la so meyor cara pa poner escontra les cuerdes a les aragoneses, que sicasí s’adelantraben nel marcador gracies a un gol de Carla Fontdegloria nel ecuador de la primer metá, llegando al descansu con victoria del C.P. Fraga pola mínima. Na segunda metá, el Cerdanyola C.H. volvía saltar a la pista con enerxía y nun tardaba en llograr l’empate con un tantu de Laura Valverde, pero’l conxuntu aragonés volvía ponese per delantre unos segundos dempués, al marcar l’arxentina Adriana Soto na xugada de saque de centru. A pesar del xarru d’agua frío, les catalanes siguieron buscando l’empate mientres tol segundu periodu, teniendo la ocasión más clara dende’l puntu de falta directa, pero Gemma Solé nun atinaba a bater a Anna Ferrer nel llanzamientu, nin al facese darréu col refugue. Nos minutos finales, el C.P. Fraga pudo aguantar el resultáu favorable, magar de los intentos del Cerdanyola C.H., y clasificábase pa les semifinales de la Copa de la Reina.
El segundu partíu de la xornada tamién diba ufiertar un gran espectáculu a l’afición presente, col C.P. Vila Sana apoderando nel xuegu, pero con munches ocasiones pal C.P. Manlleu, qu’aprovechaba perbién les recuperaciones de bola pa llanzar rápides transiciones. Sicasí, una cartulina azul a Mireia Codinach a los cinco minutos de xuegu dexaba n’inferioridá numbérica mientres dos minutos al Manlleu, lo que favoreció que’l conxuntu lleidatanu acorrexara a los sos rivales mientres esi tiempu, pero ensin llograr xubir nengún tantu al lletrónicu, y una vegada recuperada la igualdá numbérica seríen les de María Díez los que sí atinaben a anotar, al rematar con efectividá una contra Valentina Fernández. El C.P. Manlleu defendíase bien énte los ataques del Vila Sana, pero al filu del descansu Aina Florenza sacaba un disparu dende’l cantu del área pa igualar el partíu. Na segunda metá la tónica diba ser asemeyada, con opciones pa dambes escuadres, pero d’esta vuelta yera’l Vila Sana quien consiguía adelantrase, mercé al gol de Luchi Agudo cuando quedaben menos de diez minutos de partíu. A partir d’esi momentu, el C.P. Manlleu daba un pasu al frente pa buscar el 2-2, llegando a disponer de delles ocasiones clares, la más clara remataba estrellando la bola nel poste, y xugando l’últimu minutu y mediu ensin portera pa xugar los sos últimos ataques posicionales con una xugadora más, pero ensin ésitu de cara a la portería, polo que’l C.P. Vila Sana convertíase nel segundu semifinalista.
Güei va dar empiezu la segunda xornada, colos partíos ente’l Bembibre H.C. y el ORKL Bigues y Riells , que se va xugar a partir de les 17:30 y l’esperáu Telecable H.C. vs Generali Palau, que va empezar a les 20:00 hores, nel que se va realizar un homenaxe a Sara Lolo, ex xugadora del club asturianu que se retiró de les pistes al rematar la pasada temporada tres d’una carrera deportiva enllena d’ésitos y que la so camiseta va ser retirada güei nun actu que va tener llugar nos prolegómenos del partíu que van xugar les sos excompañeres.
