Los principales datos turísticos publicaos güei pol INE amuesen un meyor comportamientu del turismu en Xixón que nel restu de destinos de la España Verde.
Según los datos oficiales publicaos güei pol Institutu Nacional d’Estadística, Xixón rexistró n’agostu, magar la situación marcada pola pandemia de la Covid-19, una tasa d’ocupación hotelera del 65,1%. Esta tasa d’ocupación ye un -24,4% menor que la del añu pasáu. Sicasí, esi descensu foi menor en Xixón que nel restu de les ciudaes de la España Verde, onde la tasa d’ocupación media cayó un -32,7%.
Tamién s’observa una medría nos díes d’estancia media, que s’asitia en 2,6 nueches, un +1,8% más que nel mesmu mes de 2019. El restu de ciudaes de la España Verde atropa resultancies negatives y namás Santiago rexistra una medría (+0,1%), anque menor qu’en Xixón.
Según l’INE, el númberu d’establecimientos hoteleros abiertos al públicu nel mes d’agostu en Xixón foi de 65, seis menos de los que taben abiertos n’agostu del añu pasáu (un -8,6% menos que l’añu pasáu). Esto contrasta cola situación a nivel estatal, onde abrieron el 23,2% menos d’establecimientos al respective del mes d’agostu de 2019.
Xixón ye la única ciudá de la España Verde que consigue caltener el mesmu nivel de precios del añu pasáu n’agostu. La tarifa media diaria (ADR) asitióse en 95,44 euros, un +1,0% mayor que l’añu pasáu. El restu de ciudaes rexistra un descensu mediu del 14,7%.
El RevPAR en Xixón ye de 64,24 euros (un -23,4% menos al respective de 2019). Ye, tamién, el menor descensu de les principales ciudaes de la España Verde, una y bones la media pa toes elles reflexa un descensu del -42,8% nel RevPAR.
