Nin Mariah Carey, nin Wham, les cantautores emerxentes Maria Casals y Ariam propunxéronse crear el tema d’esta navidá. “Fa la la ye un cantar sensual pensada pa una cita navidiega que nació d’una sesión de composición nel pueblu de Cecea (Nava). Inspirándose nel R&B anglosaxón les moces artistes escribieron esti cantar a dos voces que s’alloñen de los villancicos tradicionales. El tema estrenóse esti 1 d’avientu xunto con un videoclip onde les cantantes tienen una cita navidiega. Con ritmu sele y una lletra suxerente, yá tenemos un tema pa declaraciones navidiegues en castellán.
Maria Casals (1997) ye una nueva compositora criada ente Cecea y Xixón, que pasó parte de la so adolescencia en Reinu Uníu onde empezó la so carrera artística y d’onde proceden la mayoría de les sos influencies musicales. Dende la pandemia, vive a caballu ente Asturies y Madrid pa consolidar la so carrera profesional como cantautora. Nel últimu añu participó en numberosos proyectos xunto a otres artistes emerxentes, atopando por fin un soníu col que se siente identificada: una combinación de R&B y POP que nun s’escaez de referentes llatinos y folk como Julieta Venegas o Valeria Castro. En 2024 vamos poder escuchar el so nuevu EP, frutu d’esta nueva etapa.
Ariam (2003) combina la so faceta de cantautora cola producción musical. De raigaños venezolanos y españoles empezó a compartir covers en RRSS en 2019 y anguaño prepara’l so proyectu personal mientres produz a otros artistes en Cero Studios (Madrid). La so música ta marcada pola influencia d’artistes R&B como Lauryn Hill y Alicia Keys. En conociéndose na escena madrilana Ariam y Maria Casals decidieron alloñar del ruiu de la capital y escapase unos díes a Cecea pa esperimentar y componer. D’estes intenses sesiones musicales nacieron temes risonderes como esti “Fa la la la la” y más música que vamos escuchar nel 2024.
