Gaius Sulpicius, Primus Aruntinus, Magnentia, Titus Pompeius Peregrinianus, Voconia Caregia… Estos son los personaxes del Xixón romanu que, de magar güei, tornen a la ciudá asturiana. Van tar en mupis espardíos per tolos barrios del 21 de setiembre al 19 d’ohobre y van poder vese y escuchar cola app de realidá aumentada “Gijón romano AR”.

Esta actividá enmárcase nel Día de la Ruta Vía de la Plata, que se celebra el 18 de setiembre y col qu’arranca un mes enllenu d’eventos y actividaes nes llocalidaes de la Ruta Vía de la Plata pa conmemorar una fecha simbólica pa los conceyos pelos que pasa esti itinerariu: el nacimientu de Marcus Ulpius Traianus.

Atopar los personaxes del Xixón romanu ye cenciello. Namái ye preciso buscalos en dalgún mupi en cualesquier barriu de Xixón y escanealos cola aplicación del móvil, que se pue descargar, de baldre, en www.visitagijon.com o nes tiendes Android o iOS. El personaxe entós cobra vida. A partir d’esti fin de selmana, tamién va poder conocese a estos personaxes na Villa Romana de Veranes.

Estos son los romanos que vamos atopar per Xixón:

  • Gaius Sulpicius Úrsulus: llexionariu romanu, criáu na Campa Torres.
  • Primus Aruntinus: conocíu como Primus el Capsarius pol so trabayu de caxero nes termes de Xixón.
  • Magnentia: una de les primeres moces cristianes del Conventus Asturum, nacida nel barriu de Cimavilla.
  • Titus Pompeius Peregrinianus: comerciante mui venceyáu a Xixón, onde llegó a construyir la so villa.
  • Voconia Caregia: la dama de compañía de la señora y dueña de la gran Villa de Veranes.

 

Aición marketing direuto

Arriendes de los mupis, Xixón Turismu personalizó una esbilla de patés de pescáu pa esta aición. Caún d’ellos ta empaquetáu cola imaxe de los protagonistes del Xixón romanu. Nestos envases tamién va poder emplegase l’aplicación de realidá aumentada “Gijón romano AR”.

La esbilla de patés va usase pa dar a conocer el Xixón romanu ente periodistes, blogueros y blogueres y el restu de les ciudaes de la Red de Cooperación de Ciudades en la Ruta Vía de la Plata.

Red de Cooperación de Ciudades en la Ruta de la Plata

La Red de Cooperación de Ciudades en la Ruta de la Plata ye una asociación voluntaria y ensin ánimu d’arriquecimientu constituyida por ciudaes allugaes na Ruta Vía de la Plata y na so redolada. El so oxetuvu ye asoleyar los recursos turísticos de les poblaciones que la integren y revalorizar los atractivos qu’esti itinerariu representa pola so bayura y amplitú. Un gran circuitu turísticu articuláu a lo llargo de cuasi 1.000 km y una estensión que supera los 100.000 km2, al rodiu d’una exa de ciudaes con importante padremoñu históricu, el conxuntu de perbonos recursos naturales y paisaxísticos y les cultures llocales diverses presentes nel territoriu.