Lino Rubiu Mayu, xuez del Xulgáu de lo Penal n.º 1 de Xixón, dictó’l pasáu llunes un autu pol que tornaba la suspensión de la condena de Les 6 de la Suiza, en contra de la posición de la defensa y de la Fiscalía, que se manifestaren a favor de suspender la entrada en prisión. L’abogáu de l’acusación, el ex-xuez Javier Gómez Bermúdez, alegara pela so parte en contra de la suspensión la función exemplarizante de la cárcel, más allá de los principios de reinserción recoyíos na Constitución.
Pa entender esti ingresu en prisión, hai que remontase a 2017. Entós daquella, l’actividá sindical de base de la CNT de Xixón esperimentaba una crecedera notable, frutu d’una campaña pa denunciar les condiciones nel sector de la hostelería y el pequeñu comerciu, sectores nos que los derechos llaborales vense de contino frayaos y nos que la respuesta sindical ye complicada. Ente una trentena de conflictos, la CNT empecipió una campaña de denuncia de les condiciones y actitúes que teníen llugar na Pastelería La Suiza, sita na avenida de Schultz.
Dicha campaña púnxose en marcha, como’l restu, n’intentando axustar cola empresa pa evitar llevar el conflictu a la cai. Énte estos primeros intentos d’acercamientu, la empresa y la so redolada respondieron con una negativa total a cualquier tipu de negociación, de la que presumíen de tar n’estrechu contactu cola Brigada d’Información de la comisaría xixonesa. La campaña trescurrió con normalidá, ensin nengún incidente, con concentraciones realizaes na cera d’enfrente del establecimientu y baxo la sollerte mirada policial.
Pela so parte, la empresa respondió con más de trenta denuncies al sindicatu -llegando a solicitar la so illegalización- a los sos miembros o inclusive a persones ensin vinculación col
sindicatu qu’espresaben la so solidaridá énte’l conflictu que se vivía na pastelería. Esta normalidá viose atayada tres la detención a la puerta de la so casa —y posterior puesta en llibertá, ensin el preceptivu pasu pel xulgáu— de dos de les compañeres qu’intentaren establecer negociaciones primeramente al entamu del conflictu. Mientres esta detención, les dos compañeres fueron alvertíes de que teníen que cesar el conflictu sindical si nun queríen enfrentar consecuencies mayores.
De les decenes de denuncies interpuestes pola empresa, una d’elles consiguió pasar el filtru del xulgáu d’instrucción, llegando asina al Xulgáu de lo Penal n.º 1 de Xixón, tristemente famosu dende los años ochenta pola so dureza colos insumisos o sindicalistes. Nos fechos probaos d’esti xuiciu constátase una perversa manipulación de los fechos: resalvando la so naturaleza sindical, interprétase un intentu de negociación como una obstrucción a la xusticia y una campaña de denuncia como coacciones graves.
