Emerxentes Asturies presentó en La Cósmica el vienres pasáu el so proyectu y la so visión de futuru y presente na escena artística asturiana. Na presentación, nel que se dio a conocer esti proyectu qu’arranca con enfotu y col envís de facer espoxigar la creación artística n’Asturies, anuncióse amás la primer fecha na que se va celebrar un actu entamáu por Emerxentes.
El 4 de payares va ser el pistoletazu de salida del proyectu con un micro festival celebráu na sala Acapulco de Xixón ente les 19.00 y les 23.00 hores. Va cuntar coles actuaciones musicales de trés bandes: Love Feroz, qu’acaba d’estrenar con gran ésitu’l so primer discu ‘tengo sed’, Mardom, que s’atopa grabando’l so primer álbum y tamién ye conocíu pola so faceta de cineasta col curtiu ‘Asíncronos’, y Elena del Frade, una mocísima promesa de la escena musical asturiana qu’actuó en festivales como’l Xixón Sound. Nel mesmu espaciu habrá una esposición de los artistes plásticos, Elenaenvena, ilustradora y animadora, Javi Domingo, creador d’obres que llucieron per too Xixón como los cartelos del Botánicu o del Antroxu 2023 y el ilustrador Guillermo Redondo, ganador del concursu Emerxentes pa escoyer al postrer artista d’esti festival. Amás, va haber una zona de market y un afterparty nel club Dilema.
Tres la presentación del primer actu, nel que se pueden mercar les entraes equí, hebo un alcuentru informal ente artistes que s’averaron al eventu de La Cósmica, col envís de crear sinerxes y la comuña ente les distintes creadores asturianes.
Emerxentes ye una iniciativa liderada por un grupu d’artistes asturianos y profesionales del sector de la comunicación pa fortalecer la escena emerxente del arte asturianu. Fomentando la collaboración ente artistes de diverses disciplines, ayudar a espublizar la so obra y a conectar con personalidaes de la cada industria, asesorándolos na comunicación y creando espacios d’alcuentru, Emerxentes pretende semar un suelu fértil nel que les carreres artístiques broten y se multipliquen.
