Los siete primeros autobuses con tecnoloxía híbrida diesel-llétrica que la Empresa Municipal de Tresportes de Xixón incorporó a la so flota van entamar a circular esti xueves 5 de marzu, na Llinia 10, dempués de que fueren presentaos na mañana d’esti miércoles na Plaza Mayor.
Estos autobuses Citaro Híbridu dexen un nivel d’emisiones desaxeradamente baxu en comparanza con xeneraciones anteriores, consiguiendo unos amenorgamientos, al respective de les llendes impuestes pola norma Euro VI, del 99 % en CO, 96 % n’Hidrocarburos, 83 % en Partícules y un 42 % en NOx.
Pola mor del aporte en potencia que realiza’l motor llétricu del sistema híbridu, el motor térmicu ye más pequeñu y produz menos emisiones qu’un diésel estándar pa la mesma potencia, algamando amenorgamientos d’hasta’l 52 % en CO2, del 39 % en Partícules o 3,5 % en CO2 al respective de estos postreros.
Cunten con un sistema d’aprovechamientu de la enerxía cinética procedente de les frenaes y deceleraciones que se producen nel autobús, dotáu de condensadores d’alta capacidá, capaz de producir y almacenar la lletricidá necesaria p’alimentar el motor y los sistemes llétricos y de llume del vehículu.
El motor llétricu tien una potencia de 19 cv (14 kW) y ta diseñáu para dexar al motor térmicu trabayar con unos requerimientos de potencia menores y con un rangu de trabayu más optimizáu consiguiendo con ello, menores emisiones contaminantes y baxos consumos de combustible.
El motor térmicu de 276 cv (206 kW), cumple cola norma Euru VI D, gracies al usu de diverses tecnoloxíes como un sistema d’inyección common rail d’alta presión, sistema de recirculación de gases, sistema de pos tratamientu de gases d’escape, filtru de partícules y sistema de tratamientu químicu por urea. El conxuntu motor térmicu +motor llétricu desenvuelven una potencia total de 295 cv (220 kW).
L’autobús dispón de 26 asientos, cuatro d’ellos para persones con movilidá amenorgada, dos espacios para sielles de ruedes o carrinos de ñácaru y 82 places de pies, pa una ocupación máxima de 108 places. La carrocería incorporada crez 13,5 cm. al respective de modelos anteriores.
Destaca especialmente, la nueva disposición de les dos places para sielles de ruedes o carrinos de ñácaru, separaes una d’otra de cuenta que se va dexar una meyor movilidá interior nel vehículu. El vehículu tien una rampla eléctrica y otra manual.
Pal accesu, cunten col novedosu métodu de puertes llétriques d’apertura amenorgada (tipu metro). Al igual que’l restu de los vehículos de la flota, disponen de sistema d’arrodiyamientu (kneeling), amenorgando cola so activación, l’altor d’accesu al autobús.
Amás de les midíes que yá tán presentes en tola flota de EMTUSA, dispensador d’hidroxel, mampara de separtación del puestu del conductor, ventanes mainel y claraboyes llétriques nel techu, estos vehículos disponen d’un sistema de climatización y purificación del aire interior d’alta eficacia y una potencia d’hasta 7.500 m3/hora, que dexa una tasa de renovación d’aire interior dende les 21 veces/hora hasta les 104 veces/hora.
El sistema de climatización nun dexa zones ensin anovación d’aire y priorizando la entrada del esterior. Tol aire qu’entra, tantu na situación d’aire esterior como na de recirculación interior, pasa por filtros especiales antivirales activos d’altu rendimientu, con delles capes que peneren los aerosoles más finos y trescalaes d’una solución d’ácidu cítrico como axente activu virucida. La capacidá máxima de filtración d’estos filtros ye del 99 %.
