La Empresa Municipal de Servicios de Medioambiente Urbanu de Xixón (EMULSA Medioambiente) caltién el refuerciu del so Serviciu de Llimpieza en Colexos pal Plan Especial de Llimpieza nos 40 colexos públicos y 10 escueles infantiles con un total de 793 aules, y les 14 dependencies municipales (Casa Conceyu, Atenéu de la Calzada, Xardín Botánicu, Xefatura de Policía del Coneyu…) del Conceyu de Xixón y en respuesta a la crisis sanitaria del Coronavirus.
Dende l’entamu del cursu EMULSA reforció la so plantiya destinada a la llimpieza de los centros educativos del Conceyu en más de 50 persones algamando una media 175 operarios pa dar respuesta a la crisis sanitaria del coronavirus contribuyendo a frenar les andaes nos colexos.
Pa ello en setiembre EMULSA ellaboró un Plan Especial de Llimpieza de Colexos qu’inclúi un protocolu específicu, ellaboráu polos técnicos de EMULSA en base a les directrices de la Conseyería d’Educación del Gobiernu d’Asturies y de les autoridaes sanitaries, afechu en cada centru educativu en respuesta a los pidimientos de los equipos directivos y a les sos distintes característiques, qu’inclúi la contratación, per parte d’EMULSA, d’una empresa especializada pa executar la llimpieza estraordinaria en caúna de les aules onde se produzan andaes por Coronavirus por aciu la nebulización del aula con un viricida. Dende l’entamu del cursu realizáronse más d’un centenar d’estes desinfecciones d’aules zarraes por casos de coronavirus.
El plan de llimpieza y desinfección puestu en marcha por EMULSA nos centros educativos de Xixón tresformó l’habitual llimpieza diaria en llimpieza y desinfección, con midíes como l’adaptación de los horarios del personal de EMULSA al horariu lectivu, o la llimpieza de los aseos delles vegaes al día, utilizando siempres productos hixenizantes y desinfestantes incluyíos nes llistes de viricidas aprobaos pola alministración. Otra de les acciones incluyíes ye l’aumentu de la frecuencia na llimpieza de superficies sensibles como pomos, pasamanes, ascensores, teléfonos, mostradores, puertes y cualesquier elementu susceptible de tocase frecuentemente coles manos, amás de les clases Covid d’aisllamientu d’alumnos con síntomes iniciales.
Pa garantizar la salú y la prevención de riesgos llaborales tol personal d’EMULSA destináu a la llimpieza de colexos recibió una formación específica con midíes como la hixenización diaria de la so ropa de trabayu, o que’l personal, que’l so puestu de trabayu asina lu precise, ta provistu con equipos de protección individual –los riquíos poles característiques de les funciones de cada emplegáu y so supervisión del serviciu de prevención.
Mientres el branu de 2020 EMULSA realizó trés llimpieces especiales (xunu, agostu y setiembre) a xeitu de los centros educativos con una medría del 1.600% n’hores respecto al branu de 2019 y medraron un 25% les hores destinaes a tresllaos de moblame pa contribuyir a reorganizar espacios nos colexos. Tamién se reforció y fixo medrar el personal y el trabayu de EMULSA nes zones d’actividaes estraescolares, destacando 14 colexos col serviciu 11×12, o les 1.705 llimpieces en patios reforciaos con medios mecánicos.
