Pedro Sánchez, investíu presidente del Gobiernu

0
751

El Plenu del Congresu de los Diputaos otorgó la confianza a Pedro Sánchez pa ser investíu presidente del Gobiernu. El candidatu a la reelección algamó la mayoría simple na segunda votación d’esta sesión de investidura. El socialista recibió 167 votos a favor, 165 en contra y 18 astenciones. A los votos de PSOE y Xuníes Podemos, formaciones que van formar un gobiernu de coalición, sumáronse los de Más País, Compromís, BNG, Teruel Existe y Nueva Canarias y PNV. En contra votaron los 165 diputaos del PP, Vox, Ciudadanos, Junts per Catalunya, Coalición Canaria, PRC, Navarra+, CUP y Foru Asturies. ERC y EH Bildu astuviéronse.

El candidatu resaltó que tolos ciudadanos van beneficiase de les midíes que conformen el programa qu’espunxo na primer xornada del alderique de investidura. Sánchez mentó la xubida del salariu mínimu, la llucha contra la precariedá llaboral y el desempléu, la estensión de derechos sociales, el fortalecimientu de la igualdá ente homes y muyeres, la mayor atención a les zones en riesgu de despoblación, el diálogu pa superar los contenciosos territoriales «siempres dientro de la Constitución» y l’impulsu de la ciencia, la investigación, la revolución dixital y les infraestructures.

Pedro Sánchez apuntó que se va alzar la contribución a les arques públiques de les rentes más altes. Amás, les pequeñes y medianes empreses van ver amenorgada la so carga impositiva. Otra de les prioridaes del nuevu Executivu va ser la llucha contra la emerxencia climática. «Vamos facelo asegurando una transición xusta al nuevu modelu enerxéticu. Toos ensin distinción d’ideoloxíes vamos resultar beneficiaos d’un aire más puro, d’unes agües más llimpies y de un planeta más sostenible».