Esti martes, 4 de febreru, comienza’l Congresu Mundial de Cultura Asturiana (CMCA), un actu de cuatro díes de duración (4–7 de febreru) entamáu pola Academia de la Llingua Asturiana (ALLA) cola collaboración de la Universidá d’Uviéu y la Conseyería de Cultura, Política Llingüística y Deporte del Principáu d’Asturies. Nel marcu del Edificiu Históricu de la Universidá, ufiértase nestes xornaes de gran intensividá un programa con alredor de 60
contribuciones académiques; 7 conferencies plenaries al cargu d’antropólogos con impautu internacional y 50 ponencies en dos meses simultánees.
Nel primer día, a partir de les 16:00 h, recibiráse a participantes ya inscritos nel patiu del Edificiu Históricu. A les 17:30 h, nel mesmu edificiu, na biblioteca central de la Universidá d’Uviéu, fadráse’l primer actu protocolariu del CMCA, la inauguración oficial del congresu. Pa ello va contase cola presencia d’Adrián Barbón, Presidente d’Asturies; Ignacio Villaverde, Rector Magníficu de la Universidá d’Uviéu; Xosé Antón González Riaño, Presidente de l’Academia de la Llingua Asturiana; y Roberto González-Quevedo, Presidente del Comité Organizador del CMCA25.
Darréu del actu, l’antropóloga Paz Moreno Feliu, de la UNED, va encargase de dar la conferencia inaugural «Encruciyaes de l’antropoloxía», de la que s’axunta un resume a lo cabero d’esta nota de prensa. A les 19:15, en saliendo de la biblioteca, habrá una visita guiada a la esposición «Al rodiu l’horru y la casa asturiana: les formes tradicionales» de
parte del so creador y comisariu, Ástur Paredes.
