La conseyera de Cultura, Política Llingüística y Deporte, Vanessa Gutiérrez, anunció ayeri na Xunta Xeneral la incorporación de dos nueves espertes a la comisión científica de Llaboral Centru d’Arte y Creación Industrial: Belén Álvarez Cabrera y Brenda Chávez, que se suman a los prestixosos profesionales que s’integraron apocayá nesti órganu, Blanca de la Torre y Bartomeu Marí. Estes incorporaciones van dexar reforzar el centru cultural y asesorar a la fundación.
La incorporación de Belén Álvarez Cabrera y Brenda Álvarez consolida’l prestixu y la capacidá d’análisis del centru n’árees clave como’l derechu de la cultura y la sostenibilidá nel consumu.
Belén Álvarez Cabrera
Ye socia-directora del Departamentu de Derechu de la Cultura de Gabeiras y Asociaos, con más de 20 años d’esperiencia en propiedá intelectual nos sectores audiovisual, musical, artes escéniques y creación visual. Trabayó en firmes llegales de reconocíu prestixu y dirixó l’asesoría llegal de la entidá de xestión VEGAP. Amás, participa davezu como ponente en conferencies y publicaciones especializaes en derechu de la cultura y propiedá intelectual.
Brenda Chávez
Ye periodista ya investigadora especializada en sostenibilidá, consumu y cultura. Llicenciada en Periodismu y Derechu, ye autora de diverses publicaciones sobre consumu responsable y collaboradora en medios como The Guardian, Equal Times, El País y El Saltu. Dirixió la sección de consumu sostenible «Consuma Crudeza» nel programa de radio Carne Cruda y participa viviegamente en proyectos d’investigación, formación y divulgación sobre sostenibilidá. Nos últimos años llogró delles beques nacionales ya internacionales d’investigación.
Con estes incorporaciones, Llaboral consolida’l so compromisu cola innovación, la reflexón crítica y la intersección ente arte, ciencia y tecnoloxía, asegurando una visión actualizada y multidisciplinar na so actividá.
