Dende que se conoció la sentencia del Tribunal de Cuentes que condena a l’alcaldesa Carmen Moriyón pol usu indebíu de dineru públicu, les fuercies de la oposición tán tratando de consiguir que la presidenta de Foro Asturias respuenda a delles preguntes que tán nel aire.
L’alcaldesa enfocó esta sentencia y les consecuencies na imaxe pública como un ataque y nun ta dando respuesta a les consultes de la oposición, llegando a prohibir les cuestiones plantegaes pal plenu de mañana, 10 de xunetu.

Izquierda Xunida-Más País-IAS denuncia que les entrugues eliminaes por Moriyón pal plenu son les siguientes:

¿Cómo esplica a la ciudadanía de Xixón que, percibiendo un salariu añal de 64.945,02€, ente xunu de 2018 y xunetu de 2019 cobrara amás 1.000€ mensuales en conceptu de dietes con cargu a la sovención pa gastos de funcionamientu del so grupu municipal?

Teniendo en cuenta que se trata de gastos «ensin xustificación nin títulu válidu que los ampare», ¿considera que se trata, como sostién la parte demandante, d’un sobresueldu»?

¿Cuálu ye’l detalle y la xustificación de los gastos imputaos per un sitiu a la tarxeta de creitu VISA por un importe de 8.463,54€ y por otru a la lliquidación de dietes por un importe de 13.255,30€?

La conceyala Olaya Suárez, de Podemos Xixón, denunció que «l’enfotu de l’alcaldesa ye despintar la so condena por usu indebíu de fondos públicos y tarazar el llabor de la oposición nuna esguilada de despreciu institucional ensin precedentes». Pa la conceyala de Podemos «Nun hai xustificación normativa pa suprimir 9 de les 10 iniciatives de la oposición».

Les entrugues desaniciaes pol gobiernu municipal a Podemos, y polo tanto, a les que nun responderá l’alcaldesa, son les siguientes:

¿Ta xustificao cobrar sobresueldos de dineru públicu como fixo l’alcaldesa?

¿En qué consistió l'»error contable» col qu’escusa Foro’l so usu indebíu de dineru públicu?