La conseyera de Cultura, Política Llingüística y Turismu, Berta Piñán, presentó esta mañana la propuesta deportivo y cultural Etapes del Camín, que se va celebrar ente los díes 13 y 19 d’avientu. L’eventu, promovíu pol Principáu en collaboración colos conceyos d’Ayande, Salas, Uviéu, Grandas de Salime y Tinéu, consiste na realización del itinerariu que sigue’l trazáu del Camín Primitivu al so pasu per Asturies, estremáu en siete etapes que podrán realizase andando, corriendo o en bicicleta de monte.
“Amás de promover l’actividá física, esta iniciativa quier poner en valor la riqueza del entornu natural y del patrimoniu cultural del Camín de Santiago”, esplicó Piñán.
Les persones participantes van esfrutar, amás de la mesma esperiencia deportiva, de xornaes culturales y gastronómiques arreyaes al territoriu. Por casu, en Tinéu va facese una degustación de choscu; en Berducedo, los participantes van conocer la tradicional celebración Os reises del Valledor; en Grandas de Salime va desenvolvese una visita guiada pol muséu etnográficu y nel altu d’El Garabocho tán programaos xuegos tradicionales.
L’eventu va empezar el llunes que vien, día 13, Uviéu. Toles etapes van empecipiar a les nueve de la mañana y van tener una duración averada de cinco a seis hores. El trazáu escoyíu conxuga a la perfección la tradición de la ruta xacobea cola guapura del paisaxe natural asturianu.
Etapes del Camín ta disponible pa toles persones mayores d’edá que dispongan del conocimientu, la esperiencia y el nivel físicu y psicolóxicu necesariu pa superar los problemes rellacionaos cola práctica de resistencia, el desnivel, la meteoroloxía y la xeografía.
La inscripción na prueba inclúi’l tresporte gratuitu tolos díes dende Uviéu hasta’l puntu d’entamu de la etapa correspondiente. Amás, en tol percorríu va haber servicios médicos, animación, fotografía y videu, al igual que prendes oficiales del eventu, diploma y avituallamientu.
Tola información de la propuesta deportiva pue consultase na páxina web www.etapesdelcamin.es, na que tamién se puen formalizar les inscripciones.
