La compañía Factoría Norte resultó ganadora de la tercer edición del premiu Nel Amaro de Teatru Profesional en llingua asturiana y gallego-asturianu. Ente les cuatro obres finalistes, que se representaron a lo llargo del mes de payares nel Teatru Filarmónica d’Uviéu, decidióse por mayoría conceder el gallardón al espectáculu Les rellaciones peligroses. L’acta destaca «el brillante exerciciu d’interpretación y l’axilidá y fluidez llingüística con que se desenvuelve una obra mui bien conxuntada qu’analiza en clave de comedia llixera la incomunicación que vive una sociedá tan interconectada”.
Escrita y dirixida por Eladio de Pablo, Les rellaciones peligroses ye una obra que xune drama, humor y pedagoxía pa dar a conocer la manera en que la mocedá encara los peligros del mundu de les tecnoloxíes nueves y les redes sociales, la iniciación a la so vida sexual y los prexuicios sobre la identidá de xéneru de les persones.
Factoría Norte ye una productora y compañía profesional de teatru y danza asturiana. Inició la so trayectoria en 1998 cola idea de producir espectáculos nuevos y entamar eventos artísticos pa difundir movimientos creativos que, por falta de tradición n’Asturies, yeren más desconocíos pal públicu. A lo llargo de la so carrera, la compañía representó una trentena d’espectáculos, munchos de los cualos recoyeron premios dientro y fuera d’Asturies.
A esti premiu, dotáu con 6.000 euros, podíen presentase empreses del sector profesional dedicaes a la producción y representación d’espectáculos teatrales, teniendo cabida tanto los espectáculos orixinales como les obres dramátiques yá esistentes y les versiones o adaptaciones d’espectáculos representaos orixinalmente n’otra llingua. El xuráu remarcó la “enorme calidá de toles obres finalistes, lo que dificultó enforma la decisión”.
