L’Institutu Asturianu de la Mocedá financia una nueva edición del concursu musical y del programa televisivu FestiAMAS, coles mires de promocionar ya impulsar el trabayu de mozos creadores y grupos asturianos. Les bandes y artistes que se presenten nel certame tienen de cuntar con siquier un componente menor de 35 años.
FestiAMAS ye un concursu en directu que s’emite al traviés de TPA, de cuenta que s’espubliza na pequena pantalla’l trabayu de los grupos y músicos y ufiérta-yos la oportunidá de tocar en directu nos meyores escenarios de la comunidá. El premiu pa la banda ganadora va ser una actuación nel conceyu onde fuera escoyida, por un caxé de mil euros, y la grabación d’un CD Jewelbox qu’inclúi 50 hores d’estudiu y 30 hores d’amiestu y masterización.
La directora xeneral de Mocedá, Diversidá Sexual y Derechos LGTBI, Clara Sierra, presentó güei la edición d’esti añu, cola que se van algamar siete semifinales y ocho programes de televisión, incluyida la final dientro del programa de les fiestes de San Mateo, n’Uviéu. La Conseyería de Presidencia, al traviés del Institutu Asturianu de la Mocedá, subvenciona’l festival con 18.000 euros.
Nos sos nueve primeres ediciones, FestiAMAS convirtióse nun circuitu de referencia en constante crecedera de participación y sedes y caltien los oxetivos de dar visibilidá y sofitu a les bandes d’Asturies, ufierta-yos la posibilidá de tocar en directu y apurri-yos una ventana en televisión, contribuyendo asina al espardimientu de la cultura rexonal. Participen como patrocinadores del festival Caxa Rural, radio Televisión del Principáu y los conceyos d’Uviéu, Valdés, Navia, Tapia de Casariego, Pravia, Cangas, Castrillón y La Ribera.
Na primer edición del concursu inscribiéronse más de 60 grupos y en 2021 la cifra d’inscritos algamó los 184.
La gran final n’Uviéu constitúi unu de los premios más valoraos por grupos y músicos, cuidao que implica actuar nun escenariu emblemáticu. En 2021 tocaron en directu na capital del Principáu Secta, Mardom, Diañu Blues, Arek, Disaster Sister, Sake y Diligence.
Nes ediciones anteriores resultaron ganadores Ofensivos, Zombie Dolls, Hammercross, Swap, La Kasmhir, Arnia, Drunken Buddha, Nuevecondiez y Secta.
