El Festival Arcu Atlánticu de Xixón celebra la so X edición, que va tener llugar ente’l martes 29 de xunetu y el domingu 3 d’agostu, dambos inclusive, y va ser una amuesa representativa de la creación artística actual, inspirada tanto na tradición como na vanguardia, mesmo que de les identidaes culturales de los territorios que formen parte del denomináu Arcu Atlánticu. El gruesu de la so programación va tener llugar na cai, teniendo cabida la música, el teatru, la danza, les artes plástiques y audiovisuales, la gastronomía o’l cine. Los organizadores tan acabante de dar anuncia d’un primer avance de la programación:
Martes 29 de xunetu (inauguración)
20h DAB Dantza Konpainia (Euskadi). Plaza del Marqués. Danza
Nesta propuesta artística afóndase sobre les metodoloxíes de trabayu que tuvieron de mancomún Eduardo Chillida y Cristóbal Balenciaga, por aciu el movimientu. La creación d’espacios y figures curvillinies son los conceptos de dambos artistes que guíen el movimientu de la so dómina escontra la llibertá. El períodu en que vivieron estos dos creadores foi fonte d’inspiración pa esta propuesta escénica asitiando a trés baillarinos n’escena col enfotu de qu’atopen el camín dende’l encorsetamientu escontra la llibertá.
22.00 h Fillas de Casandra (Galicia). Plaza Mayor. Música.
Nuevu espectáculu del dúo musical integráu por Sara Faro y María SOA que propón la integración de dos músiques, apostando pola organicidá del pianu, el bombu legüeru, les panderetes, los panderos, violín o les harmoníes vocales en rigorosu directu, ensin escaecer les bases electróniques producíes por María SOA y Berto.
La promesa de la música gallega conságrase con una propuesta de calidá artística y escénica onde la lluz y la escenografía vienen sumase a los yá reconocíos puntos clave de los sos ésitos: la fuerte presencia y conexón col públicu, les sos lletres directes y emotives y la so sonoridá na que vuelven demostrar que l’amiestu ente lo tradicional, el pop y el techno tienen un efectu catárticu.
Miércoles 30 de xunetu
19.30 h Tejedor (Asturies). Muséu del Pueblu d´Asturies. Música.
Conciertu del emblemáticu músicu asturianu José Manuel Tejedor que, nesta ocasión, va facer una repasada pel so principal repertoriu acompañáu de distintos músicos y amigos del panorama de la música asturiana. Esti ta formáu por temes recuperaos de la tradición oral mesmo que tamién per composiciones del propiu gaiteru, que recurre a técniques tradicionales y contemporanees pa dar la so particular visión del nuesu paisaxe sonoru.
22.00 h Skolvan (Bretaña). Centro de Cultura Antiguo Instituto. Música
Skolvan foi fundáu en 1984 por Gilles Le Bigot y Youenn Le Bihan, y nel presente incorpora a Bernard Le Dréau y Régis Huiban. L’amiestu d’influencies musicales y el respetu polos sos raigaños faen de Skolvan un referente de la música bretona con más de cuatro décades de trayectoria.
Vienres 1 d’agostu
23.00 h La Glo (Euskadi). Torre del Reló. Danza vertical
Dende lo más fondo del mar hasta la más alloñada de les galaxes too ta conectao. Ésti ye’l venceyu sagráu que nos xune. Ye l’heriedu del tiempu, la grana de la creación que toos llevamos dientro. Nesti espectáculu tituláu “Sacred” (Sagráu) propónse un viaxe per toles xeometríes divines que dan calter a la vida. Un espectáculu de danza y proyección que convida a reflexonar sobre la nota que cimbla en nós, dientro de la partitura del llatíu del universu.
